9:891  891  DISCOURS  D'ADIEU  AUX  MINISTRES.  Du  vendredy  28e  iour  d'apvril  1564,  recueilli  par  (Pinaut)  l)  et  escript  au  naif  autant  qu'il  se  Vest  peu  remettre  en  memoire,  et  de  mot  a  mot  selon  qu'il  avoit  este  prononce,  quoyque  par  quelqu'autre  ordre  en  quelques  mots  et  propos.  Mes  freres,  d'autant  que  i'ay  eu  a,  vous  dire  quelque  chose  qui  concerne  l'estat,  non  seulement  de  ceste  Eglise  mais  aussi  de  plusieurs  aultres  qui  quasi  en  dependent,  il  sera  bon  de  commencer  par  la  priere,  afin  que  Dieu  me  face  la  grace  de  dire  le  tout  sans  ambition,  mais  tousiours  regardant  a  sa  gloire,  et  aussi  que  un  chacun  puisse  retenir  et  faire  son  profit  de  ce  qui  sera  dict.  Il  pourroit  sembler  que  ie  m'advance  beaucoup  et  que  ie  ne  suis  pas  si  mal  que  ie  me  fais  accroire  :  mais  ie  vous  asseure  que  combien  que  ie  me  suis  trouve  autrefois  fort  mal,  toutesfois  ie  ne  me  trouvay  iamais  en  telle  sorte  ne  si  debile  comme  ie  suis.  Quant  on  me  prend  pour  me  mettre  seulement  sur  le  lict,  la  teste  s'en  va  et  m'esvanouis  incontinent.  Il  y  a  aussi  ceste  courte  haleine  qui  me  presse  de  plus  en  plus.  Ie  suis  en  tout  contraire  aux  autres  malades:  car  quand  ils  s'approchent  de  la  mort,  leurs  sens  s'esvanouissent  et  s'esgarent.  De  moy,  vray  est  que  ie  suis  bien  hebete,  mais  il  semble  que  Dieu  veuille  retirer  tous  mes  esprits  dedans  moy  et  les  renfermer,  et  pense  bien  que  i'auray  bien  de  la  peine  et  qu'il  me  coustera  bien  a  mourir,  et  ie  pourray  perdre  le  parler  que  i'auray  encores  bon  sens:  mais  aussi  en  ay-ie  adverty  et  ay  dict  ce  que  ie  voulois  qu'on  me  fist,  et  par  ainsy  i'ay  bien  voulu  parler  a  vous  devant  que  Dieu  me  retire,  non  pas  que  Dieu  ne  puisse  bien  faire  autrement  que  ie  ne  pense:  ce  seroit  temerite  a  moy  de  vouloir  entrer  en  son  conseil.  Quand  ie  vins  premierement  en  ceste  Eglise  il  n'y  avoit  quasi  comme  rien.  On  preschoit  et  1)  Nous  ne  savons  pourquoi  ce  nom  est  en  parenthese.