9:823  823  PREFACE  DES  ANCIENNES  BIBLES  GENEVOISES.  IEAN  CALVIN  AU  LECTEUR.  Si  ie  vouloye  ici  user  de  longue  preface,  i'auroye  trois  poinctz  a  desduire.  Le  premier  seroit  de  monstrer  quel  thresor  c'est  de  l'Escriture  saincte  :  combien  la  dignite  en  est  excellente,  et  le  profit  inestimable.  Comme  a  la  verite  c'est  le  principal  bien  et  le  plus  precieux  que  nous  ayons  en  ce  monde.  Veu  que  c'est  la  clef  qui  nous  ouvre  le  Royaume  de  Dieu,  pour  nous  y  introduire,  a  fin  que  nous  sachions  quel  Dieu  nous  devons  adorer,  et  a  quoy  il  nous  appelle.  C'est  la  voye  certaine  pour  nous  guider,  a  fin  que  nous  ne  soyons  pas  vagabons  et  errans  ca  et  la  tout  le  temps  de  nostre  vie.  C'est  la  vraye  reigle  pour  discerner  entre  le  bien  et  le  mal,  et  nous  enseigner  au  droit  service  de  Dieu,  pour  n'y  point  aller  a  l'aventure,  et  nous  abuser  avec  le  reste  du  monde  apres  des  menuz  fatras  de  nulle  valeur:  et  mesme  quelque  fois  fonder  nostre  devotion  sur  des  choses  que  Dieu  condamne  et  reprouve  comme  meschantes.  C'est  la  lumiere  qui  nous  adresse,  ou  la  lampe  qui  nous  esclaire  au  milieu  des  tenebres  de  ce  monde,  a  fin  que  nous  ne  choppions  point  a  tant  de  scandales  qui  sont  a  l'entour  de  nous,  comme  povres  aveugles:  et  qui  pis  est,  que  ne  tresbuschions  a  chacun  pas.  C'est  l'eschole  de  toute  sagesse,  voire  sagesse  surmontant  tout  entendement  humain,  et  que  les  Anges  mesmes  ont  en  admiration.  C'est  le  miroir  auquel  nous  contemplons  la  face  de  Dieu,  pour  estre  transfigurez  en  sa  gloire.  C'est  le  sceptre  Royal,  par  lequel  il  nous  gouverne  comme  son  peuple,  et  la  houlette,  laquelle  il  nous  donne  pour  enseigne  qu'il  nous  veut  estre  Pasteur.  C'est  l'instrument  de  son  alliance  qu'il  a  faicte  avec  nous,  passant  obligation  volontaire  par  sa  bonte  gratuite,  d'estre  conioinct  avec  nous  d'un  lien  perpetuel.  C'est  le  tesmoignage  de  sa  bonne  volonte,  par  lequel  nous  avons  repos  en  noz  consciences,  sachans  ou  gist  nostre  salut.  C'est  la  pasture  unique  de  noz  ames,  pour  les  nourrir  a  la  vie  eternelle.  Brief,  c'est  le  seul  moyen  en  quoy  nous  differons  d'avec  les  Payens  et  infideles:  entant  que  nous  avons  une  Religion  asseuree  et  fondee  en  la  verite  infallible  de  Dieu,  au  lieu  que  tous  les