9:854  Ad  eam  rem  non  parum  hic  liber  proderit  quia  non  aditum  modo  ad  rei  cognitionem  patefaciet,  sed  multos  etiam  fumos  discutiet,  quibus  conspicuam  lucem  adeoque  ipsum  iustitiae  solem  conatus  est  hactenus  Satan  obscurare.  Postremo  etiam  si  nullius  foret  ad  talem  actionem  libri  usus,  de  quo  tamen  minime  desperandum  est,  latius  patebit  eius  utilitas:  nam  hoc  capite  doctrinae,  quod  tractat,  non  modo  hominum  salus  continetur  aeterna,  sed  divinae  etiam  bonitatis  gloria,  quae  se  nobis  in  Christo  exhibuit,  adeoque  ipsum  exprimitur  Christi  officium  in  quo  scilicet  consistit  praecipua  sapientiae  nostrae  summa.  Quam  feliciter  porro  in  huius  argumenti  enarratione  versatus  sit  Bucerus  noster,  malo  ex  lectione  ipsa  iudicium  faciant  lectores.  Ego  sane,  quum  inter  manus  meas  esset  tam  praeclarus  labor,  committendum  minime  putavi  ut  suppressus  perpetuo  iaceret.  Aliquamdiu  continui  exspectans  si  forte  melior  daretur  opportunitas.  Sed  multae  fuerunt  causae  quas  referre  opus  non  est,  cur  amplius  differendum  non  videretur.  Fiduciam  hanc  amicitiae  nostrae  Bucerus,  ut  spero,  concedet.  Quod  si  factum  meum  initio  non  probabit,  erit  quod  levem  ac  brevem  eius  offensam  egregie  compenset,  quia  mihi  gratiam  habebit  tota  Dei  ecclesia,  cuius  maior  habenda  fuit  ratio  quam  ut  tanto  eius  dispendio  unius  hominis  voluntati  morem  gererem,  et  ipse  quoque  scriptor,  pro  singulari  aedificandae  ecclesiae  studio  quo  flagrat,  consilio  meo  rite  aestimato  non  tantum  placabitur,  sed  me  quoque  suas  partes  occupasse  gaudebit.  Genevae  Calendis  Octobris  1547.