9:789  789  PRAEFATIONES.  790  muni  bono  arceat.  Id  vero  perinde  est,  ac  si  quis  huic  aqua  et  igni,  communibusque  elementis  interdicat,  quia  nondum  iis  uti  visus  sit.  Quis  cogitasset  tantam  in  pastoribus  crudelitatem,  (nam  pastores  et  haberi  et  dici  volunt)  ut  vitae  pabulum  ex  ovium  faucibus  vi  eripere  non  horreant?  Sed  periculum  est,  inquiunt,  ne  in  multis  sua  simplicitate  labatur  vulgus,  ne  pervertat  non  intellecta,  atque  ita  venenum  pro  alimento  hauriat.  Quam  hic  impudenter  ratiocinantur?  Evangelium  est  odor  mortis  in  mortem  iis  qui  pereunt,  Iudaeis  scandalum,  Graecis  stultitia:  ergo  ne  legatur,  ne  audiatur.  At  est  virtus  Dei  in  salutem  omni  credenti,  Iudaeo  simul  et  Graeco.  Christus  est  petra  offensionis,  in  quam  multi  impingunt,  et  qua  multi  eliduntur  :  ergo  ne  sit  Christus.  Sed  est  vita  aeterna,  unica  ad  patrem  via  et  veritas.  Quando  haec  parum  solida  vident,  addunt  inter  tot  haereses  quibus  nunc  orbis  vexatur  contineri  melius  populum  obedientia  quam  doctrina.  Sed  tum  quoque  fervebant  haeresibus  omnia,  quum  ii  quos  retuli,  et  Chrysostomus  et  Augustinus,  suos  ad  studium  coelestis  doctrinae  acriter  simulabant.  Nempe  tali  eos  pharmaco  adversus  haereses  muniebant,  talibus  armis  instruebant.  Postremo  misere  deplorant  superbire  ac  ferocire  vulgus,  statim  atque  gustum  aliquem  sacrarum  literarum  concepit.  Superbire  autem  vocant,  non  ex  suo  ore  pendere,  ac  non  quasi  ex  tripode  profectum  adorare,  quidquid  vel  per  somnium  cogitaverint.  Hinc  hinc  illae  lacrymae.  Sic  quondam  Romanus  Pontifex  et  sacrificuli  vix  manus  ab  illo  continuerunt,  qui  fastos  populo  descripserat,  quorum  penes  se  esse  arbitrium  volebant.  Ad  hunc  modum  isti,  quum  fumos  suos  nisi  in  tenebris  vendere  populo  nequeunt,  nihil  mirum  si  hanc  lucem  accendi  non  sustineant  :  pessime  vero  hoc  eos  habet,  arcana  sua  quibus  plus  inest  obscoenitatis,  quam  aut  ullis  Bonae  Deae  sacris,  aut  ipsis  etiam  Bacchanalibus,  sic  palam  retegi  ac  traduci.  Alii  qui  paulo  volunt  videri  aequiores,  causantur,  tantum  vulgari  usu  contentam  debere  esse  promiscuam  plebem:  has  versiones  quae  non  modo  ad  linguarum  veritatem,  sed  ipsam  loquendi  proprietatem  exiguntur  in  eruditorum  bibliothecis  oportere  magis  versari,  quam  rudium  manibus  passim  volvi:  quorum,  ut  aiunt,  admodum  pauci  sunt,  qui  aliquid  inde  assequantur,  quam  plurimi  vero  novitate  offendantur.  Hi  quid  spectent  non  video  nisi  quod  soli  sapere  volunt.  Quum  enim  negant  usum  esse  aliquem  purioris  interpretationis,  quam  quae  nunc  habetur  tot  locis  depravatissima,  in  spiritum  sanctum  non  obscure  sunt  contumeliosi:  cuius  donum  esse  linguarum  interpretationem  affirmat  Paulus,  et  in  ecclesiae  aedificationem  conferri  postulat.  Si  donum  ipsum  spernunt,  sacrilegi:  si  supprimi  volunt  ne  multis  serviat,  invidi  et  iniqui.  Novitatem  quidem  fateor