9:788  Imo  si  istis  Rabinis  (qua  sunt  animi  vel  magnitudine  vel  ferocitate)  pudenda  est  sors  discendi  cum  plebeiis  et  rudibus:  quantum  probrum  est  a  talibus  praeceptoribus  discere,  qui  nulla  in  parte  vel  abiectissimos  excelluerunt,  nisi  quod  a  Domino  docti  erant?  Neque  in  eam  partem  haec  a  me  dicuntur,  quo  tollam  ex  ecclesia  docendi  discendique  ordinem:  quae  luculentam  Dei  benignitatem  agnoscere  debet,  dum  a  prophetis,  doctoribus,  interpretibus,  qui  ab  eo  missi  sunt,  probe  instituitur.  Sed  hoc  tantum  postulo,  ut  fideli  populo  Deum  suum  loquentem  audire  liceat,  et  a  docente  discere.  Quando  ille  a  minimo  usque  ad  maximum  cognosci  vult,  quando  omnes  θεοδιδάκτους  fore  pollicetur,  quando  conqueritur  in  suis  semper  laborandum  adhuc  esse,  quos  vocat  ablactatus  a  lacte,  avulsos  ab  uberibus:  quando  parvulis  dat  sapientiam,  pauperibus  εὐαγγελίσασθαι  praecipit.  Quum  ergo  videmus  ex  omnibus  ordinibus  esse  qui  in  Dei  schola  proficiant,  agnoscimus  eius  veritatem,  qui  promisit  effusurum  se  de  spiritu  suo  super  omnem  carnem.  Isti  contra  fremunt  et  indignantur.  Quid  hoc  est  nisi  Deo  suam  largitatem  exprobrare?  O  si  eo  saeculo  vixissent,  quo  Philippo  erant  quatuor  filiae  prophetantes,  quam  indigne  eas  tulissent?  nisi  forte  et  indignis  modis  accepissent.  Quando  vero  Dei  verbum,  quoties  libitum  est,  fortiter  contemnunt,  cur  non  patrum  saltem  exempla  imitantur,  quibus  tantum  se  deferre  simulant?  Hieronymus  non  est  dedignatus  mulierculas  studii  consortes.  Chrysostomus,  et  Augustinus  quando  non  plebem  hortantur  adhaec  studia?  quam  frequenter  inculcant,  ut  domi  relegant,  quae  in  ecclesia  audierunt?  Quid  quod  Chrysostomus  plebeiis  magis  quam  monachis  necessariam  esse  scripturae  sanctae  lectionem  contendit:  quod  variis  curarum  et  negotiorum  fluctibus  iactati  in  naufragium  statim  abriperentur  saeculi  huius,  nisi  ad  hanc  ancoram  haererent?  Laudatus  est  ab  Eusebio  Pamphilus  martyr,  qui  sacros  codices  paratos  semper  domi  habebat,  quos  et  viris  et  foeminis  largiretur.  Nec  puriore  illo  saeculo  duntaxat,  sed  multis  postea  annis  valuit  haec  libertas:  donec  corruptum  suisque  cupiditatibus  immersum  vulgus  suapte  nequitia  et  ignavia  hoc  studii  genus  abiecit.  Nunc  ubi  repeti  coepit,  emersit  haec  tyrannis,  quae  populum  a  com-