9:786  illi  mecum  intercedit  amicitia  et  consuetudine  partes  has  demandavit  ut  diligenter  in  eam  curam  incumberem  ne  qui  errores  irreperent.  Suscepi  lubens  provinciam,  ea  tamen  lege  ne  aliam  quam  negligentiae  culpam  praestare  cogar.  Videbor  enim  hic  egregie  defunctus  officio,  si  quam  ille  desiderabat  praestiterim  diligentiam.  Neque  moleste  ferre  debet  Alciatus,  ubi  aestimaverit  se  primum  iure  oppugnari,  deinde  modeste  ac  verecunde,  et  debita  honoris  praefatione  non  praetermissa.  Tantum,  opinor,  publicis  commodis  favet,  tantum  defert  veritati,  ut  nolit  illi  autoritatis  suae  praetextu  praescribere.  Ergo  quum  intelligat  veritatem  in  profundo  demersam,  concedat  etiam  disputationibus  eruendam  esse,  modo  provideatur  ne  nimium  altercando  ea  ipsa  quae  quaeritur  amittatur  veritas.  Hoc  obiter  dictum  volui  ut  eadem  opera  me  et  Alciato  et  tibi  purgarem,  quod  verear  ne  hominis  studio  in  causam  adversariam  sis  propensior,  et  hoc  ipsum  in  crimen  trahas  quod  non  stem  ab  Alciati  partibus.  Scio  enim  quam  studiose  de  eo  solitus  sis  praedicare,  de  praeceptore  optimo  nimirum  gratissimus  discipulus.  Sed  et  de  Stella,  quem  etiam  audisti,  quam  belle  sentias,  loquarisque  honorifice,  et  nuper  familiari  sermone  et  tuis  antea  multis  literis  persaepe  cognovi,  ut  iam  nullo  modo  dubitare  debeam  quin  ad  hanc  ipsam  disputationem  nihil  praeiudicatae  opinionis  sis  allaturus,  praesertim  quum  tibi  probe  notus  sit  qui  totam  hanc  rem  suo  iudicio  defendendam  suscepit,  Cheminus  noster,  homo  ut  scis  lucubrationum  patientissimus,  perspicacis  ingenii,  et  quod  est  inprimis  egregium  exactissimi  iudicii,  qui  quum  sit  in  literis  melioribus  ad  unguem  expolitus  feliciter  nunc  versatur  et  antea  diutissime  versatus  est  in  legalibus  studiis.  Quod  autem  ad  praesentem  causam  attinet,  lectoribus  liberum  esto  iudicium,  non  illis  quidem  profanis,  sed  qui  in  iuris  mysteria  paulo  altius  penetraverint.  Imo  vero  tu  ipse,  Connane  eruditissime,  iudica,  non  unus  e  populo,  sed  interioris  doctrinae  merito  vere  illo  numero  exemptus.  Equidem,  quomodo  nunc  est,  eiusmodi  disputationem  istam  esse  arbitror,  ut  facile  et  tuum  et  cuiusvis  sinceri  lectoris  iudicium  promereri  possit,  certe  debeat.  Vale.  Parisiis  pridie  No.  Mar.  Calvini  opera.  Vol  IX.  50