[SEARCH HOME] | [CONTENTS] | [기독교강요 라틴어-영어 문장별 대조본] | [원문칼빈전집안드로이드앱]

IOANNIS CALVINI OPERA QUAE SUPERSUNT OMNIA
volume column dictionary *for dictionary, click or touch the word
[Pre] [Next] [Original Text Jpg]


9:730  siam  recipi  per  baptismum,  et  in  ea  re  detestor  Anabaptistarum  furores.  Quantum  attinet  ad  coenam  Domini,  confiteor  eam  esse  testimonium  nostrae  cum  Christo  unionis:  quoniam  non  tantum  mortuus  est  semel  et  resurrexit  pro  nobis,  sed  etiam  nos  vere  pascit  et  nutrit  sua  came  et  sanguine,  ut  simus  unum  cum  eo,  et  eius  vita  sit  nobis  communis.  Quamvis  enim  sit  in  coelis  tantisper  dum  veniat  iudicaturus  orbem  terrarum,  credo  tamen  eum  arcana  et  incomprehensibili  sui  spiritus  virtute  fretum,  vivificare  animas  nostras  substantia  corporis  et  sanguinis  sui.  In  genere  autem  confiteor  Deum  tam  in  coena  quam  in  baptismo  nobis  re  ipsa  et  efficaciter  donare  quidquid  in  eis  figurat:  sed  ad  tanti  boni  perceptionem  requiri  ut  verbum  cum  signis  coniungamus.  Qua  in  re  detestor  papistarum  abusum  ac  perversionem,  qui  ex  sacramentis  sustulerunt  quod  praecipuum  erat,  nempe  doctrinam  quae  nos  doceat  verum  usum  et  fructum  inde  promanantem,  eaque  in  magicas  praestigias  commutarunt.  Item  confiteor,  aquam,  licet  caducum  sit  elementum,  tamen  nobis  in  baptismo  vere  testificari  veram  sanguinis  Iesu  Christi  et  spiritus  ipsius  praesentiam:  et  in  coena  Domini  panem  et  vinum  nobis  esse  vera  et  minime  fallacia  pignora,  nos  spiritualiter  nutriri  Christi  corpore  et  sanguine.  Et  ita  coniungo  cum  signis  possessionem  ac  fruitionem  ipsam  eius  quod  nobis  ibi  offertur.  .  Item  quum  sacra  coena,  qualis  est  instituta  a  Iesu  Christo,  sit  nobis  sacer  thesaurus  infiniti  pretii,  detestor,  ut  intolerandum  sacrilegium,  exsecrandam  illam  abominationem  missae,  ad  hoc  unum  utilem  ut  quidquid  nobis  Christus  reliquit  evertatur:  tum  in  eo  quod  dicitur  esse  sacrificium  pro  vivis  et  mortuis,  tum  vero  etiam  in  reliquis  omnibus,  quae  ex  diametro  repugnant  puritati  sacramenti  coenae  Domini.  Confiteor  Deum  velle  orbem  terrarum  regi  legibus  ac  politia,  ut  non  desint  habenae  quibus  effraenes  hominum  motus  coerceantur:  eamque  ob  causam  regna,  principatus  ac  dominationes  constituisse,  et  quidquid  ad  civilem  iurisdictionem  spectat.  Quarum  rerum  vult  autor  haberi,  ut  propter  eum.  non  tantum  feratur  illorum  imperium,  sed  etiam  eos  revereamur  et  honoremus  ut  Dei  vicarios,  et  ministros  ab  eo  constitutos,  ut  legitimo  et  sancto  munere  fungantur.  Ideoque  etiam  agnosco  aequum  esse  ut  eorum  legibus  et  statutis  pareamus,  tributa  et  vectigalia  caeteraque  eiusmodi  persolvamus,  denique  ut  ultro  ac  libenter  iugum  subiectionis  feramus  :  hac  tamen  cum  exceptione,  ut  Deo  summo  principi  suum  imperium  integrum  et  illibatum  maneat.   

[Pre] [Next]


Copyright ⓒ 2018 In Hyuk Lee. All rights reserved. http://blog.naver.com/isaaci