9:714  Tametsi  in  Christo  eligimur,  ordine  tamen  illud  prius  est  ut  nos  Dominus  in  suis  censeat,  quam  ut  faciat  Christi  membra.  Tametsi  Dei  voluntas  summa  et  prima  est  rerum  omnium  causa,  et  Deus  diabolum  et  impios  omnes  suo  arbitrio  subiectos  habet,  Deus  tamen  neque  peccati  causa  vocari  potest,  neque  mali  autor,  neque  ulli  culpae  obnoxius  est.  Tametsi  Deus  peccato  vere  infensus  est  et  damnat  quidquid  est  iniustitiae  in  homimbus,  quia  illi  displicet,  non  tamen  nuda  eius  permissione  tantum,  sed  nutu  quoque  et  arcano  decreto  gubernantur  omnia  hominum  facta.  Tametsi  diabolus  et  reprobi  Dei  ministri  sunt  et  organa,  et  arcana  eius  iudicia  exsequuntur,  Deus  tamen  incomprehensibili  modo  sic  in  illis  et  per  illos  operatur  ut  nihil  ex  eorum  vitio  labis  contrahat,  quia  illorum  malitia  iuste  recteque  utitur  in  bonum  finem,  licet  modus  saepe  nobis  sit  absconditus.  Inscite  vel  calumniose  faciunt  qui  Deum  fieri  dicunt  autorem  peccati,  si  omnia  eo  volente  et  ordinante  fiant:  quia  inter  manifestam  hominum  pravitatem  et  arcana  Dei  iudicia  non  distinguunt.