9:120  verissimam  sententiam,  et  aeque  utilem  deformat.  Dixeram  stulte  eos  facere,  qui  tantum  ad  nuda  signa,  non  etiam  ad  promissiones  illis  annexas  respiciunt.  Fatetur  recte  dictum,  et  liberaliter  calculum  suum  adiungit:  mox,  quasi  novo  oestro  percitus,  adhibendam  fuisse  cautionem  obmurmurat,  ne  divellatur  a  sacramentis  promissio.  Quid  ?  An  non  diserte  fuit  adhibita,  ubi  individuo  nexu  coniunxi?  Sacrilegum  fieri  divortium  admonui,  si  quis  nudum  signum,  et  a  promissione  distractum  sibi  habere  velit.  Obstrepit  Westphalus,  cavendum  esse  ne  separetur  a  signis  promissio  :  ac  si  cisternae  architectum  increpet,  sedulo  rimas  omnes  obturantem,  ac  dicat  cavendum  esse,  ne  aqua  per  rimas  effluat.  Quidnam  agere  conor,  nisi  ut  se  intra  verbum  contineant,  qui  ex  sacramentis  fructum  appetunt?  In  hoc  labore  me  deprehendit  Westphalus,  et  obiurgat,  ac  si  dicerem,  baptismum  nihil  nisi  aquam  esse:  in  coena  nihil  esse  praeter  panem  et  vinum.  Ego  autem  cur  [pag.  172]  Augustini  testimonium  citavi:  Sublato  verbo  aquam  non  esse  nisi  elementum,  verbo  accedente  fieri  ut  sacramentum  esse  incipiat,  nisi  ut  sacramenta  ex  verbo  aestimanda  esse  ostenderem,  cui  sic  cohaerent,  ut  ab  eo  distracta  naturam  suam  amittant?  Sed  hoc  est  scilicet:  non  putavit  Westphalus  se  hostem  contra  nos  satis  acrem  visum  iri,  nisi  apertissimam  veritatem  odio  nostri  convelleret,  minutissimos  quosque  apices  arriperet  ad  litis  materiam,  et  mel  ipsum  sua  amarulentia  inficeret:  maluitque  coram  toto  mundo  pudorem  suum  prostituere,  quam  fraterculis,  qui  pruritum  eius  demulcent,  non  se  probare  in  omnibus  nobis  infestum.