54:370 Voila donc ce que nous avons a retenir de ceste doctrine : c'est ascavoir, que quand nous serons destituez de tout secours humain, que nous ne laissions pas de nous appuyer en Dieu, scachans que luy seul est assez puissant pour nous delivrer, et quand nous aurons senti son aide, que nous concluons avec sainct Paul, qu'il nous delivrera de toute oeuvre mauvaise. Car sainct Paul ne dit pas ici que Dieu le delivre de la mort (combien que desia ii eust fait son conte qu'il faloit qu'il fust presente en sacrifice), mais il se contente que Dieu le fortifie de son sainct Esprit, tellement qu'il puisse mourir pour le tesmoignage de son Evangile. Il ne luy chaut de sa persecution ne de tous les tourmens qu'il faut qu'il endure, moyennant qu'il obeisse a Dieu, et qu'il obtiene la victoire par dessus toutes les tentations et assauts qu'il luy faudra soustenir. Ainsi nous en faut-il faire. Et au reste, retenons la priere qu'il fait ici en la fin, Que le Seigneur Iesus soit avec l'esprit de Timothee. Ii est vray que si nous sommes en la protection de nostre Dieu, nos corps seront preservez de luy aussi bien, et en tout et par tout il nous subviendra selon qu'il nous est utile. Mais cependant que nous n'ayons point tant nos corps pour recommandez, que l'ame n'ait le degre souverain. Ainsi qu'il nous suffise moyennant que nostre Dieu soit avec nostre esprit, et que nous soyons preservez de luy, et que nostre Seigneur Iesus Christ nous tiene en sa garde, tellement que nous soyons conduits, non pas seulement durant ceste vie caduque et transitoire, mais iusques a la mort, et par dessus mesmes, tellement que nous ne demandions sinon de glorifier nostre Dieu, iusqu'a ce qu'il nous ait fait participans de son immortalite glorieuse. Or nous-nous prosternerons devant la face de nostre bon Dieu, etc. Calvini opera. Vol LIV.