52:436  aliter  discernere  licebit  quisnam  sit  haereticus,  nec  reiicere  fas  esset  nisi  quem  prius  conati  essemus  ad  sanam  mentem  reducere.  Admonitionem  porro  intelligit  non  quamlibet,  vel  hominis  privati,  sed  quae  fit  a  ministro,  publica  ecclesiae  autoritate.  Perinde  enim  valent  eius  verba  ac  si  diceret,  graviter  quasi  censoria  correctione  reprimendos  esse.  Qui  autem  colligunt  ex  hoc  loco,  sola  excommunicatione  compescendos  esse  pravorum  dogmatum  autores,  nec  esse  ultra  in  eos  saeviendum:  non  satis  apposite  ratiocinantur.  Aliae  enim  episcopi,  aliae  magistratus  sunt  partes.  Tito  scribens  Paulus,  non  disserit  de  officio  magistratus,  sed  quid  episcopo  conveniat.  Quamquam  moderatio  semper  optima:  ne  tam  vi  et  armata  manu  coerceantur,  quam  corrigantur  disciplina  ecclesiae,  si  quidem  sint  sanabiles.  l  l  .  Sciens  quod  eversus  sit  Eversum  nominat  in  quo  nulla  resipiscentiae  spes  est:  quia  si  restitui  posset  quispiam  nostro  labore,  nequaquam  esset  omittendus.  Metaphora  sumpta  est  ab  aedificio,  quod  non  modo  aliqua  sui  parte  collapsum  est,  sed  funditus  dirutum,  ut  instaurationi  non  sit  locus.  Huius  eversionis  signum  addit,  malam  conscientiam,  quum  dicit,  tales,  qui  monitionibus  non  obtemperant,  per  se  esse  damnatos.  Nam  quum  pervicaciter  respuant  veritatem,  certum  est  sponte  et  data  opera  peccare:  nullo  itaque  profectu  monerentur.  Simul  autem  colligimus  ex  Pauli  verbis,  non  esse  quemquam  temere  aut  praecipitanter  pro  haeretico  habendum.  Dicit  enim:  Sciens  quod  eversus  sit.  Caveat  ergo  episcopus  ne  morositati  suae  indulgens  durius  tractet,  tanquam  haereticum,  quem  nondum  esse  novit.  13.  Zenam  legisperitum.  Incertum  est  iurisne  civilis  an  legis  mosaicae  peritum  intelligat:  sed  quum  ex  Pauli  verbis  elicere  liceat,  hominem  tenuem  fuisse  et  alienae  opis  indigum  :  probabilius  est  ipsum  eiusdem  fuisse  ordinis  cuius  erat  Apollos:  hoc  est,  apud  Iudaeos  divinae  legis  interpretem.  Tales  enim  frequentius  esurire  solent,  quam  qui  forenses  causas  suo  consilio  gubernant.  Zenae  egestatem  dixi  ex  Pauli  verbis  colligi  posse:  quia  deducere  hic  viatico  prosequi  significat:  quemadmodum  ex  contextu  liquet.  Ne  enim  sumptu  gravari  se  querantur  Cretenses,  quibus  id  oneris  iniungit,  admonet  non  debere  esse  infructuosos:  ideoque  urgendos  esse  ut  bonis  operibus  sint  intenti.  Verum  de  hac  loquutione  prius  dictum  est.  Sive  ergo  excellere  bonis  operibus  eos  iubeat,  sive  eminentem  locum  dare:  significat  utile  illis  esse,  praeberi  exercendae  liberalitatis  materiam,  ne  sint  infrugiferi,  hoc  praetextu  quia  desit  occasio,  vel  necessitas  non  postulet.  Quae  sequuntur,  iam  in  aliis  epistolis  fuerunt  exposita.