50:268  sibi  autoritatis  sumat,  nempe  quia  insignia  Christi  gestet  in  suo  corpore.  Quae  sunt  illa?  nempe  carceres,  et  vincula,  flagella,  colaphi,  lapidationes,  probra  denique  omne  genus,  quae  pro  evangelii  testimonio  pertulerat.  Nam  sicut  militiae  terrenae  sunt  sua  decora,  quibus  militum  virtutem  imperatores  insigniunt:  ita  dux  noster  Christus  suis  insignibus  ornat  quorum  egregia  opera  usus  est,  ut  inter  alios  emineant  conspicui.  Sed  multum  haec  differunt  ab  illis  prioribus.  Resipiunt  enim  crucem:  ideo  sunt  ignominiosa  coram  mundo.  Quod  etiam  sonat  nomen  stigmatis.  Nam  stigmata  ad  verbum  sunt  punctiones  :  sed  ita  olim  vocabantur  notae,  quae  vel  barbaris  servis,  vel  fugitivis,  vel  maleficis  inurebantur.  Proprie  itaque  loquutus  est  Paulus,  quum  iis  notis  se  fulgere  iactat,  quibus  insignire  praestantissimos  suos  milites  solet  Christus:  hoc  est,  quae  foedae  sunt  coram  mundo  et  pudendae,  sed  coram  Deo  et  angelis  cunctos  mundi  honores  antecellunt.  18.  Gratia  Christi  cum  spiritu  vestro.  Ita  gratiam  illis  precatur,  ut  non  modo  se  liberaliter  in  eos  effundat,  sed  eam  quoque  vero  animi  sensu  apprehendant.  Tunc  enim  vere  illa  fruimur,  dum  ad  spiritum  nostrum  pervenit.  Rogandus  ergo  Deus  ut  sedem  gratiae  suae  in  animis  nostris  paret.  Amen.