5:508  qui  vel  exsecrabili  mercede  conducti,  vel  quia  sic  improbi  sunt  natura,  ut  sine  pretio  malefacere  ipsos  delectet,  intestini  belli  semina  huc  illuc  spargunt,  variis  aculeis  animos  hinc  inde  exasperant,  ubi  aliquid  est  praeparatum,  subiectis  facibus  accendunt  ignem,  ubi  scintillam  aliquam  conceptam  vident  fomenta  adhibent,  et  malarum  artium  flabellis  flammam  excitant.  Nec  quieturi  videntur,  donec  uno  incendio  totam  G-ermaniam  viderint  conflagrare;  et  quia  eiusmodi  facinoribus  volunt  inclarescere,  non  invidebo  illis  honorem  suum.  Quanquam  omnes  commemorare  nec  volo  nec  possum,  sed  in  Heldio  et  Fusco  quam  insigne  par  videmus  ad  omnes  nequitiae  numeros  comparatum?  Quorum  prior  Grermaniam  per  multos  iam  annos  variis  factionibus  lacerando  hoc  consequutus  est  ut  Deo  hominibusque  sit  exosus,  nec  secus  ab  omnibus  bonis,  ac  infaustum  aliquod  ominosumque  portentum  refugiatur,  et  tamen  novas  identidem  nocendi  occasiones  reperiat.  Alter  ex  tenebricoso  aliquo  coeno  non  ita  pridem  emersus,  unde  etiam  nomen  retinet,  quo  moram  compenset  strenua  sedulitate,  cursitando,  prehensando,  [fol.  51]  satagendo  turbare,  si  quid  est  tranquilli  et  compositi,  non  desinit.  Et  quo  virus  suum  latius  evomat,  sanguinariis  dialogis  ad  caedes  et  strages  clementissimum  Caesarem  aliosque  principes  instigat.  His  hodie  emissarios  utitur  sanctissimus  pater  ad  columen  rerum  suarum  sustinendum.  Ac  ne  quis  dubitet  ex  genuina,  et  quasi  domestica  sedis  apostolicae  cohorte  ipsos  esse  omnibus  vitae  partibus  testatum  faciunt,  se  non  esse,  a  romana  sanctitate  degeneres.  Nec  a  privilegiis  abstinent,  quae  solis  curialibus  alias  conceduntur.  Nam  quod  Furvus  ipse  puellam  adhuc  viro  imparem  beluina  ac  prorsus  monstrosa  intemperie  stuprando  ita  graviter  violavit,  ut  paulo  post  sit  mortua,  et  misera  matre  contumeliae  orbitatisque  iniuriam  persequente,  disruptis  legum  ac  iudiciorum  vinculis  impune  evaserit,  quis  ex  singularibus  illis  Romanensium  privilegiis  esse  neget?  Hoc  obiter  volui  indicare,  ut  qui  salvam  patriam  cupiunt,  bono  publico  favent,  communi  pace  student,  non  tantum  ab  illis  artificibus,  qui  huc  ex  officina  romana  emittuntur,  sed  ab  his  etiam  intestinis  scelerum  omnium  architectis  cavendum  meminerint.  Caeterum  quia  tot  difficultatibus  circumsessi  vix  inveniunt  pii  quo  se  vertent,  nisi  praeteritis  hominibus  recta  in  Deum  respiciant,  hoc  agendum  nobis  est,  ut  Christi  nostri  adventum  exspectemus,  qui  sua  claritate  hunc  Dei  adversarium  dissipabit  et  spiritu  oris  sui  conficiet.  Datum  Bethuliae  ludeae  Anno  1541.  mense  Martio.