5:459  DE  LA  CENE.  ainsi  a  este  demenee  trop  amerement  par  l'espace  de  quinze  ans  ou  environ,  sans  que  iamais  les  uns  ayent  voulu  escouter  les  autres  d'un  cueur  paisible.  Car  combien  qu'ilz  ayent  une  fois  confere  ensemble,  neantmoins,  il  y  avoit  telle  alienation,  qu'ilz  s'en  retournerent  sans  aucun  accord.  Mesme,  au  lieu  d'approcher  de  quelque  bon  appoinctement,  ilz  se  sont  tousiours  recullez  de  plus  en  plus,  ne  regardans  autre  chose  que  a  desfendre  leur  sentence,  et  confuter  tout  ce  qui  estoit  au  contraire.  Nous  avons  doncq  en  quoy  Luther  a  failly  de  son  coste,  et  en  quoy  OEcolampade  et  Zuingle  ont  failly  du  leur.  C'estoit,  du  commencement  l'office  de  [pag.  70]  Luther  d'admonnester  qu'il  n'entendoit  pas  establir  une  telle  presence  locale  que  les  Papistes  la  songent.  Item,  de  protester  qu'il  ne  vouloit  pas  faire  adorer  le  Sacrement  au  lieu  de  Dieu.  Tiercement,  de  se  abstenir  de  ces  similitudes  tant  rudes  et  difficiles  a  concevoir,  ou  en  user  moderement,  les  interpretant  en  sorte  qu'elles  ne  peussent  engendrer  nul  scandale.  Depuis  le  debat  esmeu  il  a  excede  mesure,  tant  en  declarant  son  opinion,  comme  en  blasmant  les  autres  avec  une  amertume  de  parolle  trop  rigoureuse.  Car  au  lieu  de  s'exposer  en  telle  sorte  qu'on  peust  recevoir  sa  sentence,  selon  sa  vehemence  accoustumee,  pour  impugner  les  contredisans,  il  a  use  de  formes  hyperbolicques  de  parler,  lesquelles  estoient  bien  dures  a  porter  a  ceux  qui  autrement  n'estoient  pas  fort  disposez  a  croire  a  son  dire.  Les  autres  ont  offense  aussi,  en  ce  qu'ilz  se  sont  tellement  acharnez  a  crier  contre  l'opinion  superstitieuse  et  fantasticque  des  papistes,  [pag.  71]  touchant  la  presence  locale  du  corps  de  Iesus  Christ  dedans  le  Sacrement,  et  l'adoration  perverse  qui  s'en  ensuyvoit,  qu'ilz  se  sont  plus  efforcez  de  ruyner  le  mal,  que  d'esdifier  le  bien.  Car  combien  qu'ilz  n'ayent  pas  nye  la  verite,  toutesfoys  ilz  ne  l'ont  pas  enseignee  si  clairement  qu'ilz  debvoient.  I'entens,  que  en  mettant  trop  grand'  peine  a  maintenir  que  le  pain  et  le  vin  sont  nommez  corps  et  sang  de  Christ,  a  cause  qu'ilz  en  sont  signes,  ilz  n'ont  pas  regarde  de  adiouster  qu'ilz  sont  tellement  signes  que  la  verite  est  conioincte  avec.  Et  ainsi  protester  qu'ilz  ne  pretendoient  nullement  d'obscurcir  la  vraye  communion  que  nous  donne  le  Seigneur  en  son  corps  et  son  sang  par  ce  Sacrement.