5:416  magnae,  fateor,  contentiones  efferbuerunt,  a  quibus  antea  otium  erat.  Sed  nostris  hominibus  immerito  id  imputetur,  qui  nihil  toto  actionis  suae  decursu  quaesierunt,  nisi  ut  instaurata  religione  in  veram  unitatem  discordiis  fusae  ac  dispersae  ecclesiae  colligerentur.  Et  ne  vetera  commemorem,  quid  nuper  recipere  detrectarunt,  tantum  ut  ecclesiis  pacem  conciliarent?  Sed  frustra  omnia  experiuntur,  vobis  contra  nitentibus.  Quia  enim  pacem  illi  habere  cupiunt,  cum  qua  simul  floreat  Christi  regnum:  vos  autem,  quidquid  accedit  Christo,  deperire  vobis  putatis,  non  mirum  est  si  fortiter  resistatis.  Et  habetis  artes,  quibus  evertatis  uno  die,  quidquid  ipsi  multis  mensibus  pro  Christi  gloria  instituunt.  Non  multis  verbis  te  obruam,  quia  uno  verbo  expedire  rem  licet.  Obtulerunt  se  nostri  ad  reddendam  suae  doctrinae  rationem.  Cedere  non  detrectant,  si  victi  rationibus  fuerint.  Per  quos  nunc  stat,  quominus  et  optima  pace,  et  veritatis  luce  fruatur  ecclesia?  I  nunc,  et  nos  seditiosos  appella,  qui  ecclesiam  quiescere  non  sinamus.  Ne  quid  autem  praetermitteres,  quod  ad  gravandam  causam  nostram  faceret,  quia  multae  paucis  istis  annis  sectae  ebullierunt,  eius  quoque  rei  invidiam,  pro  tuo  candore,  in  nos  derivas:  sed  vide  qua  aequitate,  [fol.  48]  vel  quo  etiam  praetextu.  Nam  si  nos  propterea  odio  digni,  iusto  quoque  olim  odio  apud  impios  laborasset  christianum  nomen.  Aut  ergo  desine  hac  parte  nos  infestare:  aut  palam  profitere,  christianam  religionem  tollendam  ex  hominum  memoria,  quae  tot  mundo  tumultus  pariat.  Hoc  ergo  causae  nostrae  minime  obesse  debet,  quod  modis  omnibus  conatus  est  Satan  Christi  opus  impedire.  Hoc  quaerere  magis  ad  rem  pertinebat,  quis  omnibus  quae  se  extulerunt  sectis  expugnandis  incubuerit.  Constat  autem  nos  solos,  vobis  otiosis  ac  stertentibus,  totam  hanc  molem  sustinuisse.  Faxit  Dominus,  Sadolete,  ut  tu  ac  reliqui  omnes  tui  aliquando  intelligatis,  non  aliud  esse  ecclesiasticae  unitatis  vinculum,  quam  si  Christus  Dominus,  qui  nos  Deo  patri  reconciliavit,  in  corporis  sui  societatem  nos  ab  ista  dissipatione  recolligat:  ut  ita  uno  eius  verbo  ac  spiritu  in  cor  unum  et  animam  unam  coalescamus.  Argentorati  Calendis  Septembribus  1539.