49:1  1  COMMENTARIUS  IN  EPISTOLAM  PAULI  AD  ROMANOS.  ARGUMENTUM.  In  praedicanda  Epistolae  huius  utilitate,  nescio  an  operae  pretium  sit  diutius  immorari,  tum  quod  vereor  ne  meis  elogiis  haud  dubie  infra  eius  magnitudinem  longe  subsidentibus  nihil  quam  obscuretur:  tum  etiam  quod  multo  magis  ipsa  primo  statim  adspectu  se  proferat,  et  vera  specie  melius  se  explicet  quam  ullis  verbis  enarrari  queat.  Ergo  iam  ad  argumentum  ipsum  transire  satius  fuerit:  unde  citra  controversiam  protinus  constabit,  praeter  plurimas  alias,  et  eas  eximias  dotes,  hanc  ei  proprie  competere,  quae  nunquam  pro  dignitate  satis  aestimetur:  quod,  si  quis  veram  eius  intelligentiam  sit  assequutus,  ad  reconditissimos  quosque  scripturae  thesauros  adeundos  habeat  apertas  fores.  Epistola  tota  sic  methodica  est,  ut  ipsum  quoque  exordium  ad  rationem  artis  compositum  sit.  Artificium  quum  in  multis  apparet,  quae  suis  locis  observabuntur,  tum  in  eo  maxime  quod  inde  argumentum  principale  deducitur.  Nam  apostolatus  sui  approbationem  exorsus,  ex  ea  in  Evangelii  commendationem  incidit:  quae  quum  necessario  secum  trahat  disputationem  de  fide,  ad  eam  quasi  verborum  contextu  manu  ducente  delabitur.  Atque  ita  ingreditur  principalem  totius  epistolae  quaestionem,  fide  nos  iustificari,  in  qua  tractanda  versatur  usque  ad  finem  quinti  capitis.  Sit  ergo  nobis  istorum  capitum  proposita  thesis,  unicam  esse  hominibus  iustitiam,  Dei  misericordiam  in  Christo:  dum,  per  evangelium  oblata,  fide  apprehenditur.  Terum,  quia  homines  suis  vitiis  indormiunt  et  blandiuntur,  et  falsa  iustitiae  opinione  se  deludunt,  ut  se  indigere  fidei  iustitia  non  putent,  nisi  iam  omni  confidentia  deiecti:  rursum  libidinum  dulcedine  inebriati,  atque  in  alta  securitate  demersi  sunt,  ut  non  facile  excitentur  ad  quaerendam  iustitiam,  nisi  divini  iudicii  terrore  perculsi:  utrumque  exsequitur,  ut  suae  iniquitatis  eos  convincat,  et  torporem  convictis  excutiat.  Principio  ab  ipsa  mundi  compositione  damnat  ingratitudinis  universum  hominum  genus:  quod  in  tanta  operum  excellentia  Opificem  non  recognoscant:  imo,  quum  agnoscere  cogantur,  non  eo  quo