48:626  Brief,  nous  sommes  quasi  stupides,  tellement  que  nous  ne  pouvons  gouster  ni  la  Parolle  de  Dieu  ni  la  vertu  de  son  sainct  Esprit,  sinon  que  nous  soyons  esveillez  comme  par  force.  Voyla  donc  a  quoy  a  tendu  ce  qui  est  yci  recite,  qu'il  s'est  esleve  un  tourbillon,  comme  d'un  vent  impetueux.  Or  en  premier  lieu  nous  voyons  que  la  descente  du  sainct  Esprit  a  este  pour  esmouvoir  tout  le  monde  et  pour  faire  trembler  tout  le  genre  humain,  a  ce  que  Dieu  soit  adore  d'un  commun  accord  et  qu'on  s'assuietisse  a  luy.  Et  cependant  il  faut  que  nous  soyons  esveillez,  d'autant  que  nous  sommes  par  trop  stupides,  et  que  nous  soyons  aussi  amenez  a  l'obeissance  de  Dieu,  estans  despouillez  de  toute  outrecuidance:  scachans  bien  qu'il  n'y  a  que  toute  misere  en  nous,  que  nous  ne  sommes  que  fange  et  pourriture,  voire  mesmes  qu'il  n'y  a  que  corruption  en  nos  ames  iusques  a  ce  que  Dieu  nous  ait  renouvelez.  Et  au  reste,  quand  le  S.  Esprit  est  descendu  en  telle  figure,  c'est  a  dire  en  langues  descoupees  et  comme  de  feu,  c'a  este  pour  mieux  exprimer  comme  Dieu  vouloit  besongner  par  la  predication  de  l'Evangile.  Si  un  homme  parle,  sa  voix  s'escoule  en  l'air  et  c'est  une  chose  morte.  Or  il  est  dit  que  l'Evangile  est  la  puissance  de  Dieu  en  salut  a  tous  croyans.  Comment?  un  son  qui  voie  en  l'air  et  qui  s'escoule  pourra-il  nous  amener  iusqu'au  Royaume  des  cieux?  Nul  ne  scauroit  de  soy  creer  une  seule  mousche:  il  est  question  que  l'image  de  Dieu  soit  reparee  en  nous,  que  nous  recevions  ceste  semence  incorruptible  pour  parvenir  a  la  gloire  celeste,  pour  estre  compagnons  des  Anges,  pour  estre  transfigurez  mesmes  en  la  gloire  et  immortalite  de  nostre  Seigneur  Iesus  Christ,  et  estre  participans  de  sa  nature  Divine,  comme  S.  Pierre  en  parle.  Et  cela  se  pourra-il  faire  par  la  voix  d'un  homme?  Ii  est  certain  que  non:  mais  il  est  yci  dit  notamment  que  le  S.  Esprit  est  conioint  comme  d'un  lieu  inseparable  avec  la  parolle  qui  se  presche.  Car  pourquoy  est-ce  qu'il  a  prins  ceste  figure  de  langues?  Il  est  certain  qu'il  y  a  tousiours  quelque  similitude  entre  les  signes  visibles  et  la  verite  qui  y  est  figuree.  Il  faut  donc  que  nous  regardions  pourquoy  le  S.  Esprit  est  apparu  en  forme  de  langues.  C'est  pour  monstrer  qu'il  seroit  en  la  bouche  des  Apostres,  et  qu'il  leur  donneroit  ce  qui  estoit  requis  pour  exercer  leur  office  et  leur  commission,  et  mesmes  qu'il  feroit  profiter  leur  labeur  a  ce  qu'il  ne  fust  pas  inutile.  Car  aussi  en  premier  lieu  nous  scavons  que  le  plus  habile  qui  se  pourra  trouver  ne  scauroit  point  prononcer  un  seul  mot  sinon  qu'il  soit  gouverne  par  le  S.  Esprit.  Et  en  cela  Dieu  monstre  que  c'est  de  nous,  veu  que  nous  ne  scaurions  ouvrir  la  bouche  pour  dire  un  seul  mot  a  sa  gloire,  qui  veint  a  propos,  sinon  d'autant  qu'il  nous  est  donne.  Il  a  donc  bien  falu  que  lea  40