39:505  PRAELECTIONES  IN  LAMENTATIONES  IEREMIAE.  Quoniam  statui  exponere  Threnos  Ieremiae,  videndum  est  quando  hic  liber  compositus  fuerit  a  propheta,  unde  etiam  colligere  licebit  quale  fuerit  autoris  consilium.  Nimis  crassus  est  error  Hieronymi,  qui  existimat  hoc  esse  carmen  lugubre,  quod  cecinit  Ieremias  super  morte  Iosiae  regis.  Nihil  enim  videbimus  quod  Iosiae  conveniat.  Fiet  quidem  mentio  regis  uno  in  loco,  sed  quod  illic  dicitur  non  potuit  competere  in  Iosiam.  Neque  enim  tractus  fuit  in  exsilium,  et  sepultus  fuit  Ierosolymae  cum  patribus  suis.  Ex  toto  igitur  contextu  iudicium  fieri  potest,  librum  hunc  compositum  fuisse  postquam  urbs  fuerat  excisa,  et  populus  in  exsilium  abductus.  Quidam  existimant  Ieremiam,  antequam  clades  illa  accideret,  historice  descripsisse,  et  tamen  fuisse  vaticinatum  de  re  futura  et  adhuc  incognita.  Sed  hoc  minime  probabile  est.  Hic  enim  Ieremias  ponit  ante  oculos  quae  omnes  sciebant  iam  esse  facta.  Et  facile  videbimus  rationem  docendi  quam  tenet,  prorsus  alienam  esse  a  vaticiniis:  Non  dubium  igitur  est,  quin  Ieremias  post  urbem  excisam  et  templum  incensum  defleverit  cladem  gentis  suae,  non  more  profano,  sed  ut  in  rebus  quoque  perditis  ostenderet  restare  tamen  aliquem  usum  doctrinae:  quod  diligenter  notandum  est.  Nisi  enim  hoc  teneamus,  frigebit  nobis  totus  hic  liber.  Sed  si  dirigamus  mentes  nostras  in  illam  vastitatem,  quae  tunc  potuit  non  vulgares  tantum  e  populo  exanimes  reddere,  sed  deiicere  ipsum  prophetam,  ut  prorsus  a  fide  excideret,  certe  hinc  colligemus  singularem  fructum.  Facile  est  magnifice  extollere  Dei  gratiam  in  rebus  prosperis,  deinde  hortari  ad  fiduciam  qui  adhuc  bene  sperant,  et  proferre  in  medium  Dei  promissiones,  ut  in  ipsas  recumbant  piorum  animi:  sed  ubi  omnia  sunt  desperata,  et  Deus  videtur  ecclesiam  suam  deseruisse,  si  adhuc  viget  prophetia,  et  Deus  apparet,  qui  manum  porrigat  miseris  et  fere  deploratis,  hinc  multum  proficiemus:  et  illa  est  praecipua  utilitas  doctrinae.  Atqui  videmus