38:4  4  nquit,  mors  prae  vita  ab  omnibus  reliquiis.  Hinc  colligitur  quam  gravis  fuerit  illa  vindicta  Dei:  si  quidem  nihil  futurum  sit  melius,  vel  magis  optandum  quam  defungi  una,  et  simplici  morte,  quod  scilicet  vita  nihil  aliud  esset  quam  continuus  languor  vel  cruciatus.  Expetetur  igitur  mors  in  omnibus  locis  ubi  fuerint  superstites,  ad  quae  loca  ego  expulero  eos.  Ostendit  causam  duplicis  miseriae:  quoniam  non  dabitur  illis  vivere  in  patria,  sed  extorres  erunt,  atque  in  ipso  exsilio  sentient  manum  Dei  sibi  esse  infestam,  ac  si  huc  et  illuc  eos  persequeretur.  4.  Et  dices  ad  eos.  Sic  dicit  Iehovah,  An  qui  ceciderunt  non  resurgent?  si  quis  aversus  fuerit  non  revertetur  ?  5.  Quare  rebellis  est  populus  hic  Ierosolymae  rebellione  perpetua?  (forti,  ad  verbum),  adhaeserunt  fraudi  (vel,  apprehenderunt  fraudem),  noluerunt  reverti.  Quanquam  Deus  prophetam  suum  admonuerat  de  eventu,  tamen  iterum  Iudaeos  ad  resipiscentiam  invitat,  non  quod  sperandum  sit  posse  revocari  ad  sanam  mentem  (dixit  enim  prorsus  esse  desperatos),  sed  ut  minus  excusabilis  esset  eorum  pertinacia.  Deinde  voluit  etiam  consulere  exiguo  piorum  numero,  qui  adhuc  residui  erant.  Neque  enim  omnes  ad  unum  usque  defecerant  ad  impietatem,  quamvis  totum  populi  corpus  esset  corruptum.  Deus  ergo  partim  ut  culpam  impii  populi  aggravet,  partim  ut  consulat  fidelibus  suis,  hortatur  ad  poenitentiam  eos  qui  tamen  erant  prorsus  intractabiles.  Et  hic  consideranda  est  nobis  Dei  bonitas,  qua  quisquis  abutitur,  accersit  sibi  multo  gravius  iudicium.  Quodammodo  enim  certat  hic  Deus  cum  malitia  illius  populi,  quum  proponit  spem  veniae  si  resipiscant.  Dices  igitur  ad  eos,  hoc  est,  quamvis  tibi  iam  fuerim  testatus  inutilem  fore  tuam  operam,  non  tamen  cessabis.  An  qui  ceciderunt  resurgent?  Varie  exponitur  hic  locus.  Maior  pars  interpretum  restringit  ad  solos  Iudaeos.  An  Iudaei  non  resurgent  postquam  ceciderunt?  Quod  ad  secundum  membrum  spectat,  quidam  ita  exponunt,  An  si  Israel  revertatur  non  revertetur  etiam  Deus?  nempe  ab  ira  sua,  hoc  est,  an  erit  propitius?  vel,  An  si  avertatur  Israel,  an  non  vicissim  avertetur  Deus?  Alii  utrumque  membrum  intelligunt  de  populo  ipso:  An  si  aversus  semel  fuerit  populus,  non  redibit  ad  Deum?  Nam  hoc  verbum  DUP  contrarias  habet  significationes.  Accipitur  enim  pro  deficere,  pro  rebellare,  pro  ire  in  contrariam  partem:  accipitur  etiam  pro  reverti.  Sed  dum  propius  expendo  et  verba,  et  consilium  prophetae,  existimo  generalem  esse  sententiam:  quasi  dixisset,  Si  quis  ceciderit,  statim  cogitat  de  corrigendo  lapsu:  si  quis  declinaverit  a  recto  itinere,  postquam  admonitus  est  de