37:469  469  PRAELECTIONES  IN  IEREMIAM.  Postquam  expositis  duodecim  prophetis  minoribus,  pervenimus  tandem  ad  finem  Danielis,  iam  suscepi  librum  Ieremiae  explicandum,  modo  tamen  vita  suppetat,  et  detur  otium.  Quod  si  per  Dei  gratiam  otium  dabitur,  restabit  unus  ex  prophetis  Ezechiel,  cui  utinam  contingat  magis  idoneus  interpres,  ut  spero.  Quantum  ad  Ieremiam  pertinet,  hoc  primo  observatu  dignum  est,  coepisse  fungi  prophetae  officio,  regnante  Iosia,  et  quidem  anno  decimotertio  regni  eius.  Nam  etsi  rex  ille  sincerus  erat  Dei  cultor,  tamen  res  tunc  valde  confusae  erant.  Perierat  enim  liber  legis.  Ita  poterat  quisque  pro  sua  libidine  fingere  multos  impios  errores.  In  tanta  licentia  minime  dubium  est,  quin  multi  homines  turbulenti  conati  fuerint  pervertere  Dei  cultum,  et  puram  doctrinam:  et  quisque  sibi  fabricatus  sit  multas  nugas.  Nam  si  vellent  sacerdotes  recte  docere,  tota  eorum  scientia  pendebat  ex  lege.  Etsi  autem  probabile  est,  non  prorsus  fuisse  abolitam  eius  memoriam,  tamen  restabant  duntaxat  quaedam  fragmenta,  ut  certo  colligere  non  possent,  qualis  ratio  ecclesiae  gubernandae  divinitus  fuisset  tradita.  Nam  refertur  in  sacra  historia,  librum  fuisse  repertum  anno  decimo  octavo  Iosiae.  Itaque  a  toto  quadriennio  iam  docere  coeperat  Ieremias,  imo  quinquennio.  Hoc  autem  exemplum  satis  demonstrat  quanta  sit  hominum  incuria  et  segnities  in  studio  pietatis.  Iusserat  Deus  per  Mosen  non  tantum  sancte  et  diligenter  servari  in  templo  legis  exemplar,  sed  etiam  apud  ipsos  reges:  deinde  additum  fuerat  praeceptum  ut  festis  solennibus  recitaretur  tota  lex  populo.  Sed  postquam  reges  coeperunt  desciscere  a  vero  Dei  cultu,  nullum  apud  eos  exstitit  legis  exemplar.  Tandem  etiam  lex  ipsa  prorsus  intercidit.  Nec  dubium  est,  quin  hoc  acciderit  per  tyrannidem  regis  Manasse,  qui  crudeliter  saeviit  tam  in  sacerdotes  quam  in  reliquos  Dei  servos.  Ubicunque  enim  micabat  tantum  aliqua  scintilla  pietatis,  erat  intentus  ad  caedes,  ita  ut  flueret  sanguis  per  totam  Ierosolymam,  quem-