29:232  desolation  horrible.  Or  afin  toutesfois  que  le  peuple  ne  se  desbauchast  point,  et  qu'il  ne  quittast  point  l'alliance  de  Dieu,  Malachie  les  renvoye  a  la  Loy  de  Moyse:  comme  s'il  disoit:  Tout  ce  que  vous  avez  eu  d'instruction,  n'estoit  sinon  a  ce  que  vous  demeuriez  en  la  Loy  de  Dieu.  Et  falloit-il  que  Moyse  demeurast  en  son  entier  pour  ce  faire  :  Nenni  :  la  Loy  a  este  donnee  par  Moyse,  la  grace  et  la  verite  nous  l'avons  en  Iesus  Christ.  Or  maintenant  quand  il  est  dit  que  nul  Prophete  n'a  este  pareil  a  Moyse,  qui  ait  veu  Dieu  face  a  face:  cognoissons  que  c'est  afin  que  nous  venions  a  ceste  conclusion  de  S.  Iean:  Que  nostre  Seigneur  Iesus  Christ,  qui  est  le  Fils  unique,  est  venu  du  sein  de  son  Pere,  pour  nous  reveler  ses  secrets,  et  pour  accomplir  toutes  les  choses  qui  avoyent  este  predites  par  les  Prophetes:  et  plusieurs  Rois  et  Prophetes  ont  desire  de  voir  et  d'ouir  ce  que  maintenant  nous  oyons  et  voyons,  et  n'en  ont  pas  eu  la  iouissance.  Ainsi  donc  cognoissons  que  Iesus  Christ  n'a  pas  este  un  simple  Prophete,  mais  il  est  le  Dieu  vivant,  qui  a  este  manifeste  en  chair  et  en  nature  humaine,  afin  que  nous  apprenions  de  nous  arrester  du  tout  a  luy,  et  qu'il  nous  souvienne  de  ce  que  dit  l'Apostre  au  commencement  de  l'Epistre  aux  Hebrieux:  Que  Dieu  auparavant  avoit  bien  parle  a  nos  peres  en  plusieurs  sortes  et  manieres,  et  que  maintenant  nous  avons  une  conclusion  finale  de  tout,  quand  il  nous  a  revele  sa  volonte  par  nostre  Seigneur  Iesus  Christ.