55:205  205  EPISTOLA  PETRI  APOSTOLI  PRIOR.  ARGUMENTUM.  Consilium  Petri  est  in  hac  epistola,  fideles  ad  sui  abnegationem  mundique  contemptum  hortari,  ut  liberi  carnis  affectibus,  terrenisque  omnibus  impedimentis  soluti,  ad  coeleste  Christi  regnum  toto  animo  adspirent:  ut  spe  erecti,  suffulti  patientia,  fortitudine  et  constantia  muniti,  tentationes  omne  genus  superent,  atque  hoc  stadium  et  meditationem  tota  vita  prosequantur.  Itaque  statim  a  principio,  qua  potest  verborum  amplitudine,  Dei  gratiam  nobis  in  Christo  patefactam  praedicat.  Simul  autem  addit,  fide  recipi  ipsam,  et  spe  possideri,  ut  mentes  et  corda  pii  supra  mundum  attollant.  Inde  ad  sanctitatem  hortatur,  ne  inane  reddant  pretium  quo  redempti  sunt:  et  ne  incorruptibile  verbi  semen,  quo  regeniti  sunt  in  vitam  aeternam,  corrumpi  vel  emori  patiantur.  Quia  autem  verbo  Dei  renatos  dixerat,  simul  mentionem  facit  spiritualis  infantiae.  Porro  ne  vacillet  aut  titubet  eorum  fides,  quia  Christum  a  toto  fere  mundo  vel  contemni,  vel  reiici  vident,  admonet  hoc  modo  impleri  quod  de  eo  scriptum  est,  fore  lapidem  scandali.  Sed  rursus  docet  stabile  esse  iis  qui  in  eum  credunt  salutis  fundamentum.  Hinc  iterum  commemorat  in  quantum  honorem  ipsos  Deus  extulerit,  ut  pristini  sui  status  commemoratione,  et  praesentis  beneficii  sensu  animentur  ad  pie  vivendi  studium.  Postea  delabitur  ad  particulares  exhortationes:  ut  modeste  et  obedienter  sub  principum  imperio  se  contineant:  ut  servi  dominis  sint  subiecti:  uxores  pareant  maritis  suis,  pudice  et  continenter  se  gerant:  ac  vicissim  mariti  uxores  humaniter  tractent.  Deinde  praecipit  ut  mutuam  inter  se  aequitatem  colant:  quod  ut  libentius  faciant,  fructum  illis  proponit  prosperam  vitam  et  quietam.  Quia