2:1  IOANNES  CALVINUS  LECTORI.  In  prima  huius  nostri  operis  editione,  quia  eum  quem  pro  immensa  sua  bonitate  Dominus  successum  dedit  minime  exspectabam,  leviter,  maiori  ex  parte  (ut  in  minutis  operibus  fieri  solet)  defunctus  eram;  verum  quum  intelligerem,  eo  piorum  fere  omnium  favore  exceptum  esse,  quem  nunquam  voto  expetere,  nedum  sperare  ausus  fuissem:  ut  mihi  plus  multo  deferri  ex  animo  sentiebam  quam  essem  promeritus  ,  ita  magnae  ingratitudinis  fore  putavi  nisi  adeo  propensis  in  me  studiis,  ac  meam  industriam  sponte  invitantibus,  despondere  saltem  pro  mea  tenuitate  conarer.  Neque  id  secunda  tantum  editione  tentavi,  sed  quoties  deinde  excusum  fuit  opus  nonnulla  accessione  locupletatum  fuit.  Etsi  autem  laboris  tunc  impensi  me  non  poenitebat,  nunquam  tamen  mihi  satisfeci,  donec  in  hunc  ordinem  qui  nunc  proponitur  digestum  fuit.  Nunc  me  dedisse  confido  quod  vestro  omnium  iudicio  probetur.  Certe  quanto  studio  ad  operam  hanc  ecclesiae  Dei  praestandam  incubuerim  luculentum  testimonium  proferre  licet,  quod  proxima  hyeme  dum  existimabam  a  febre  quartana  mortem  mihi  denuntiari,  quo  magis  urgebat  morbus,  eo  minus  mihi  peperci,  donec  librum  superstitem  relinquerem,  qui  tam  benignae  piorum  invitationi  gratiam  aliquam  rependeret.  Maluissem  equidem  citius,  verum  sat  cito  si  sat  bene.  Opportune  autem  prodisse  tunc  putabo  ubi  sensero  uberiorem  adhuc  quam  antehac  fructum  aliquem  ecclesiae  Dei  attulisse.  Hoc  mihi  unicum  votum.  Et  sane  mecum  m,ale  ageretur,  nisi  unius  Dei  approbatione  contentus,  vel  stulta  et  perversa  imperitorum,  hominum,  vel  iniqua  et  maligna  improborum  iudicia  contemnerem.  Nam  quamvis  Deus  et  propagandi  regni  sui,  et  adiuvandae  publicae  utilitatis  studio  animum  meum  penitus  addixerit,  mihi  quoque  probe  conscius  sim,  ipsum  et  angelos  testes  habeam,  nihil  ex  quo  officium  doctoris  in  ecclesia  suscepi,  mihi  fuisse  propositum  quam  ecclesiae  prodesse,  sinceram  pietatis  doctrinam  asserendo:  neminem  tamen  esse  puto  qui  pluribus  impetatur,  mordeatur  et  laceretur  calumniis.  Quum  iam  sub  prelo  esset  epistola,  certo  rescivi,  Augustae,  ubi  conventus  ordinum  imperii  agebatur,  sparsum  fuisse  de  mea  ad  papatum  defectione  rumorem  et  cupidius  quam  par  erat  in  aulis  principum  exceptum.  Haec  est  scilicet  eorum  gratitudo  quos  certe  non  latent  plurima  constantiae  meae  experimenta,  quae  ut  calumniam  adeo  foedam  respuunt,  ita  ab  ea  me  apud  omnes  aequos  et  humanos  iudices  tueri  debuerant.  Fallitur  autem  cum  tota  sua  caterva  diabolus,  si  me  putidis  mendaciis  obruendo,  hac  indignitate  fractiorem  vel  magis  lentum  fore  putat:  quia  Deum  pro  immensa  sua  bonitate  daturum  mihi  confido,  ut  in  cursu  sanctae  suae  vocationis  aequabili  tolerantia  perseverem.  Cuius  rei  novum  in  hac  editione  documentum  piis  lectoribus  exhibeo.  Porro  hoc  mihi  in  isto  labore  propositum  fuit,  sacrae  theologiae  candidatos  ad  divini  verbi  lectionem  ita  praeparare  et  instruere,  ut  et  facilem  ad  cam  aditum  habere,  et  inoffenso  in  ea  gradu  pergere  queant.  Siquidem  religionis  summam  omnibus  partibus  sic  mihi  complexus  esse  videor,  et  eo  quoque  ordine  digessisse,  ut  si  quis  eam  recte  tenuerit,  ei  non  sit  difficile  statuere  et  quid  potissi-  Calvini  opera.  Vol.  ll.  1