58:99  99  SIXIEME  SERMON  100  Dieu  nous  honore  ainsi,  sans  que  nous  en  soions  dignes,  faut-il  encore  que  nous  soions  paresseux,  pour  nous  emploier  par  dessus  toutes  nos  vertus,  voire  selon  la  grace  qu'il  nous  aura  faite,  et  selon  nostre  faculte:  et  qu'encore  nous  barguignions  avec  lui?  Voila  comme  les  fideles  se  doivent  inciter:  et  que  ce  soit  aussi  pour  nous  apprendre  a  continuer  tousiours  de  cheminer  en  crainte  et  solicitude,  quand  nostre  Seigneur  nous  monstre  que  ceux  lesquels  il  appelle,  souvent  se  rendent,  et  se  monstrent  indignes  de  leur  vocation.  Afin  donques  que  nous  ne  le  tentions  pas,  et  que  nous  soyons  prests  a  recevoir  ce  qu'il  nous  enseigne,  voila  pourquoy  il  est  dit  qu'il  remunere  nos  services:  non  pas  que  nous  meritions  aucun  salaire.  Car  (comme  i'ay  desia  dit)  il  ne  faut  pas  ici  entrer  en  dispute  de  ce  que  nous  pouvons  faire:  car  nous  ne  pouvons  rien  du  tout,  et  mesme  ce  que  nous  avons  fait  par  la  grace  de  Dieu,  ne  merite  nulle  recompense:  car  Dieu  le  peut  condamner  a  iuste  titre.  Mais  il  est  question  que  Dieu  accepte  de  sa  pure  liberalite  ce  que  nous  faisons,  pour  nous  donner  meilleur  courage.  Et  chacun  doit  appliquer  ceci  a  son  profit,  quand  nous  sentons  que  nous  sommes  retardez  a  bien-faire  par  nostre  nonchalance  et  paresse.  Voila  donc  en  somme  ce  que  nous  avons  ici  a  retenir.  Or  quand  il  est  dit,  qu'Abraham  a  obei  a  la  voix  de  Dieu:  c'est  pour  nous  monstrer  la  vraie  regle  de  bien  vivre,  afin  que  chacun  ne  se  forge  point  ses  devotions  a  part,  comme  nous  avons  accoustume  de  faire.  Car  quand  les  hommes  veulent  servir  a  Dieu,  que  sont-ils?  Ils  se  donnent  licence  de  vivre  a  leur  poste,  et  mesprisent  tout  ce  que  Dieu  commande.  Qu'est-ce  qu'on  appellera  Service  de  Dieu  en  la  Papaute?  Ce  que  les  hommes  ont  invente  de  leur  folle  cervelle.  Car  quand  on  aura  bien  ramasse  toutes  ces  basteleries  qui  se  font  la,  si  on  dit  que  Dieu  est  bien  servi  et  honore  et  cependant  qu'on  ne  face  rien  de  tout  ce  qu'il  a  commande,  et  qu'on  le  mesprise,  il  en  avient  comme  il  s'en  plaint:  c'est  assavoir,  que  les  hommes,  a  cause  de  leurs  traditions,  reiettent  ce  qui  leur  estoit  ordonne.  Puis  qu'ainsi  est  donc,  que  nous  sommes  si  enclins  de  vouloir  mettre  en  avant  nos  folles  imaginations,  apprenons  quand  l'Escriture  nous  parle  de  bien  vivre,  et  sainctement,  quand  elle  nous  parle  de  la  perfection  que  Dieu  approuve,  c'est  de  obeir  a  sa  voix:  comme  aussi  il  nous  le  monstre  par  son  Prophete,  Vous  ay-ie  demande  que  vous  me  offriez  sacrifice?  Or  il  est  certain  que  Dieu  l'avoit  bien  demande.  Et  pourquoy  donc  Ieremie  parle-il  ainsi?  C'est  pour  monstrer  que  Dieu  ne  se  y  arreste  pas.  Quoy  donc?  Qu'on  obeisse  a  sa  voix,  dit-il.  Voici  donc  le  principal,  et  par  ou  il  faut  commencer,  et  c'est  aussi  bien  la  fin  ou  il  nous  faut  tendre.  C'est,  que  Dieu  ait  l'authorite  de  nous