46:964  nous  est  contraire  et  ennemi.  Et  ainsi  malheur  sur  toutes  les  resiouissances  du  monde,  d'autant  qu'elles  seront  converties  en  grincement  de  dents,  iusques  a  ce  que  les  hommes  soyent  appointez  avec  Dieu.  Maudites  donc  soyent  toutes  resiouissances,  tous  honneurs,  toutes  choses  desirables,  iusques  a  tant  que  nous  sentions  que  Dieu  nous  recoit  a  merci:  et  qu'estans  ainsi  reconciliez  avec  luy  nous  puissions  nous  esiouir,  voire  non  pas  d'une  ioye  terrestre,  mais  de  celle  qui  notamment  nous  est  promise  au  sainct  Esprit,  afin  que  nous  la  cherchions  en  luy.  Or  ce  sont  choses  inseparables  que  la  paix  et  la  ioye.  Car  comment,  nous  voyons  environnez  de  tant  de  miseres,  avons-nous  de  quoy  nous  esiouir?  Et  puis,  voyans  que  nous  sommes  maudits  en  Adam,  que  nous  sommes  enfans  d'ire,  que  Dieu  estant  nostre  iuge  est  arme  de  vengeance  pour  nous  abysmer,  quelle  ioye  pourrons-nous  concevoir  estans  en  tel  estat?  Certes  quand  nous  y  pensons,  non  seulement  il  faut  que  nous  soyons  accablez  d'inquietude,  mais  en  une  gehenne  horrible,  et  qui  surmonte  toutes  les  angoisses  de  ce  monde,  voire  sinon  que  le  diable  nous  ait  ensorcelez:  comme  nous  en  voyons  beaucoup  qui  ne  laissent  pas  de  s'esgayer,  combien  qu'ils  facent  la  guerre  a  Dieu.  Mais  si  nous  avons  une  seule  goutte  de  sentiment  en  nous,  il  est  certain  que  nous  serons  tousiours  en  torment  iusques  a  ce  que  Dieu  nous  soit  declare  propice.  Il  faut  donc  que  ceste  paix  precede,  que  nous  scachions  que  Dieu  nous  advoue  pour  ses  enfans,  voire  d'autant  qu'il  ne  nous  impute  point  nos  pechez.  Or  sommes-nous  ainsi  paisibles  avec  Dieu?  Alors  nous  avons  aussi  de  quoy  nous  esiouir,  voire  avec  Dieu,  suyvant  ce  que  i'ay  desia  touche.  Car  les  incredules  auront  bien  quelque  paix:  (c'est  a  dire  ils  sont  tellement  eslourdis  qu'il  ne  leur  chaut  du  iugement  de  Dieu,  mesmes  ils  le  despitent)  mais  ce  n'est  pas  avec  Dieu.  Car  iamais  ils  n'ont  paix  ni  repos,  sinon  quand  ils  oublient  et  Dieu  et  euxmesmes,  et  qu'ils  sont  abbrutis  du  tout.  Mais  S.  Paul  nous  exhorte  d'avoir  paix  avec  Dieu,  c'est  a  dire  de  regarder  a  luy,  et  cercher  comme  nous  pourrions  estre  paisibles:  c'est  qu'estans  approchez  de  luy  nous  soyons  certains  et  asseurez  de  son  amour.  Et  comment  cela  se  fera-il?  par  la  remission  de  nos  pechez,  par  l'amour  gratuite  qu'il  nous  porte  en  nostre  Seigneur  Iesus  Christ.  Or  donc  notons  bien  que  la  paix  que  preschent  yci  les  Anges  de  Paradis  a  apporte  ceste  ioye,  de  laquelle  le  premier  Ange  avoit  fait  mention,  disant,  Ie  vous  annonce  une  grande  ioye,  c'est  le  salut  que  vous  aurez  en  Iesus  Christ.  Il  est  appele  nostre  paix,  et  ce  titre-la  declare  que  nous  serions  alienez  du  tout  de  Dieu,  sinon  qu'il  nous  receust  par  le  moyen  de  son  Fils  unique.  Et  puis  de  la  nous  avons  aussi  de  quoy  nous  glorifier  quand  Dieu