52:96  quod  incognitum  fuerit  saeculis  et  generationibus:  hoc  est  ab  initio  mundi  per  tot  aetatum  circuitus.  Quod  autem  de  evangelio  loquatur,  apparet  ex  cap.  16,  25  epistolae  ad  Romanos,  ad  Ephesios  cap.  3,  9,  et  similibus.  Sed  ratio  appellationis  quaeritur.  Nonnulli,  quia  Paulus  nominatim  gentium  vocationem  attingit,  hanc  solam  rationem  appellationis  esse  iudicant,  quod  Dominus  quasi  ex  insperato  gratiam  suam  effuderit  in  gentes,  quas  vitae  aeternae  communicatione  in  perpetuum  privasse  videbatur.  Atqui  propius  omnia  intuenti,  hanc  tertiam  esse  rationem  patebit,  non  solam  :  quod  quidem  pertinet  ad  praesentem  locum,  et  illum  alterum  ad  Romanos,  quem  citavi.  Prima  enim  est,  quod,  quum  sub  obscuris  tam  verborum  quam  caeremoniarum  involucris  ante  Christi  adventum  ecclesiam  suam  gubernasset  Deus,  subito  plena  claritate  affulsit  per  evangelii  doctrinam.  Secunda,  quod,  quum  nihil  ante  cerneretur  praeter  externas  figuras,  exhibitus  fuerit  Christus  secum  ferens  plenam  veritatem  quae  latuerat.  Tertia  est  quam  dixi,  quod  totus  orbis,  qui  hactenus  a  Deo  alienus  fuerat,  in  spem  salutis  vocetur,  et  omnibus  offeratur  eadem  aeternae  vitae  haereditas.  Harum  rerum  attenta  consideratio  coget  nos  mysterium  hoc,  quod  praedicat  Paulus,  suspicere  et  adorare:  quamlibet  contemptim  habeatur  a  mundo,  vel  etiam  rideatur.  Quod  nunc  revelatum  est.  Ne  quis  aliorsum  traheret  nomen  mysterii,  quasi  de  re  adhuc  abstrusa  et  ignota  loqueretur,  addit  nunc  tandem  fuisse  publicatum,  ut  hominibus  innotesceret.  Quod  igitur  suapte  natura  arcanum  erat,  patefactum  Dei  voluntate  fuit.  Quare  non  est  quod  nos  obscuritas  absterreat  post  Dei  revelationem.  Addit  tamen  sanctis:  quia  non  omnibus  revelatur  Dei  brachium,  ut  eius  consilium  intelligant.  27.  Quibus  voluit.  Hic  vero  fraenum  iniicit  hominum  audaciae,  ne  plus  sapere  vel  inquirere  sibi  permittant,  quam  oportet:  sed  hoc  uno  contenti  esse  discant,  ita  Deo  placuisse.  Dei  enim  voluntas  abunde  sufficere  nobis  debet  pro  causa.  Hoc  tamen  praecipue  dictum  est  ad  gratiae  Dei  commendationem:  quia  innuit  Paulus,  homines  minime  causam  praebuisse  Deo  ut  participes  fierent  huius  arcani,  quum  docet  ipsum  sponte  fuisse  huc  adductum,  et  quia  voluerit.  Vulgare  enim  est  apud  Paulum,  Dei  beneplacitum  quibuslibet  hominum  meritis  et  externis  causis  opponere.  Quae  sint  divitiae.  Semper  observandum  quam  magniloquus  sit  in  extollenda  evangelii  dignitate.  Sciebat  enim  eam  esse  hominum  ingratitudinem,  ut  hunc  inaestimabilem  thesaurum,  et  quantumvis  excellentem  Dei  gratiam  secure  nihilominus  contemnant,  aut  certe  vilipendant.  Ergo  non  contentus  nomine  mysterii,  addit  gloriam,  et  eam  quidem  non  exiguam  aut  vulgarem.  Divitiae  enim