50:96  spiritualem  consolationem  vocat,  qua  se  sustentant  fideles  in  afflictionibus.  Nam  impii,  aut  sensum  mali  fugiendo  mentemque  ad  vagas  cogitationes  abstrahendo,  inanibus  solatiis  se  ludunt,  aut  succumbunt  penitus  moerori  seque  obrui  patiuntur.  Fideles  autem  ex  afflictione  ipsa  gaudii  materiam  petunt.  Quemadmodum  ad  Romanos  8  visum  est.  Et  profunda  illorum  paupertas.  Metaphora  sumpta  a  vasis  exhaustis.  Ac  si  diceret,  exinanitus  fuisse  Macedones,  ut  iam  ad  fundum  perventum  foret,  in  tantis  angustiis  ipsos  dicit  abundasse  simplicitate,  ac  fuisse  divites  :  non  modo  quoad  ipsis  sufficeret  ad  proprium  usum,  sed  alios  quoque  iuvandos.  En  ratio,  qua  semper  etiam  in  arctissima  paupertate  futuri  simus  liberales:  nempe,  si  quod  facultatibus  arcae  deest,  simplicitate  animi  suppleamus.  S  i  m  p  l  i  c  i  t  a  s  malignitati  opponitur:  quemadmodum  12,  8  ad  Romanos:  ubi  eam  a  diaconis  requirit  Paulus.  Hoc  enim  est  quod  nos  aequo  tenaciores  reddit,  quum  nimis  accurate  et  nimis  procul  circumspicimus  quae  evenire  possunt  pericula,  quum  nimium  cauti  sumus  ac  solliciti,  quum  morosius  expendimus  quantum  nobis  opus  sit  in  totam  vitam,  vel  denique  quantum  aliquantula  parte  detracta  fiat  diminutionis.  Qui  pendet  a  benedictione  Domini,  animum  habet  explicatum  his  tricis:  et  simul  manus  solutas  ad  beneficentiam.  Iam  ducendum  argumentum  a  minori  ad  maius:  Macedonibus  non  obstitit  exigua  fortuna,  imo  paupertas,  quin  fratribus  benefacerent:  quid  ergo  excusationis  habebunt  Corinthii,  si  cessent,  opulenti  prae  illis  et  copiis  affluentes?  3.  Pro  viribus  atque  etiam  supra  vires.  Quum  dicit  fuisse  voluntarios,  intelligit  sponte  adeo  fuisse  propensos  ad  officium,  ut  supervacua  fuerit  exhortatio.  Magnum  erat  pro  virium  mensura  contendere.  Ergo  rarae  et  admirandae  virtutis  fuit,  supra  vires  niti.  Loquitur  autem  vulgari  hominum  more:  nam  haec  usitata  est  benefaciendi  regula,  quam  Salomon  praescribit  (Prov,  5,  15),  bibere  aquam  ex  fontibus  nostris,  et  rivos  derivare,  qui  ad  alios  defluant:  Macedones  autem,  omissa  sui  ratione,  et  se  ipsos  propemodum  obliti,  suam  sollicitudinem  ad  alios  curandos  potius  contulerunt.  Denique  quibus  res  angusta  est  domi,  supra  vires  prompti  sunt,  si  quid  in  alios  impendunt  ex  sua  tenuitate.  4.  Multa  cum  obtestatione  rogantes.  Amplificat  illam  promptitudinem,  quod  non  modo  non  exspectaverint  monitorem,  sed  eos  quoque  rogaverint  a  quibus  fuerant  monendi,  nisi  sua  sedulitate  omnium  studia  antevertissent.  Iterum  hic  repetenda  est  superior  comparatio  minoris  et  maioris:  si  Macedones  non  rogati  ultro  properant,  imo  alios  praeveniunt  rogando:  quam  turpe  est  Corinthiis  torpere:  praesertim  ubi  sunt  admoniti?  Si  Macedones  omnibus  viam  praemonstrant,  quam  turpe  est  Corinthiis  non