10.1:96  portera.  C'est  a  dire,  sans  preiudicier  a  la  liberte  que  nous  devons  avoir  d'enseigner,  selon  que  Dieu  nous  le  commande,  et  faire  les  choses  qui  sont  de  nostre  office.  Et  ainsi  ie  promets  de  servir  tellement  a  la  Seigneurie  et  au  peuple,  que  par  cela  ie  ne  soye  aucunement  empesche  de  rendre  a  Dieu  le  service  que  ie  luy  doy  en  ma  vocation.  Or  ainsi  qu'il  est  requis  de  bien  examiner  les  Ministres  quand  on  les  veut  eslire,  aussi  faut-il  avoir  bonne  police  a  les  entretenir  en  leur  devoir:  pour  quoy  faire  premierement  sera  expedient  que  tous  les  Ministres,  pour  conserver  purete  et  concorde  de  doctrine  entre  eux,  conviennent  ensemble  un  iour  certain  de  la  sepmaine,  pour  avoir  conferance  des  Escritures:  et  que  nul  ne  s'en  exempte  s'il  n'a  excuse  legitime.  Si  quelqu'un  y  estoit  negligent,  qu'il  en  soit  admoneste.  Quant  a  ceux  qui  preschent  par  les  villages  dependans  de  la  Seigneurie,  que  nos  Ministres  de  la  ville  les  ayent  a  exhorter  d'y  venir  toutes  les  fois  qu'ils  pourront.  Au  reste,  s'ils  defaillent  un  mois  entier,  que  on  tienne  cela  pour  negligence  trop  grande  sinon  que  ce  fust  par  maladie,  ou  autre  legitime  empeschement.  Et  pour  cognoistre  comment  chacun  est  diligent  a  estudier,  et  que  nul  ne  s'annonchalisse,  chacun  [page  10]  exposera  a  son  tour  le  passage  de  l'Escriture  qui  viendra  lors  en  ordre.  Et  en  la  fin  quand  les  Ministres  se  seront  retirez,  chacun  de  la  compagnie  advertira  ledict  proposant  de  ce  qui  sera  trouve  a  redire,  afin  que  telle  censure  lui  serve  de  correction.  S'il  y  sortoit  quelque  different  de  la  doctrine,  que  les  Ministres  en  traittent  ensemble  pour  discuter  la  matiere.  Apres  (si  mestier  estoit)  qu'ils  appelent  les  Anciens  et  commis  par  la  Seigneurie,  pour  aider  a  appaiser  la  contention.  Finalement,  s'ils  ne  pouvoyent  venir  a  concorde  amiable  pour  l'obstination  de  l'une  des  parties,  que  la  cause  soit  deferee  au  Magistrat  pour  y  mettre  ordre.  Pour  obvier  a  tous  scandales  de  vie,  il  sera  mestier  qu'il  y  ait  forme  de  correction  sur  les  Ministres  selon  qu'il  sera  expose  ci  apres,  a  laquelle  eux  tous  sans  nul  exempter  se  submettront  :  qui  sera  aussi  le  moyen  pour  conserver  le  Ministere  en  reverence,  et  que  la  parole  de  Dieu  ne  soit  par  le  mauvais  bruit  des  Ministres  en  deshonneur  ou  mespris.  Car  comme  on  corrigera  celui  qui  aura  delinque,  aussi  sera  besoin  de  reprimer  les  calomnies  et  faux  rapports  qu'on  pourroit  faire  iniustement  contre  les  innocens.  Mais  premierement  est  a  noter,  qu'il  y  a  des