51:95  95  SERMONS  la  nourriture  du  corps,  neantmoins  qu'il  nous  appelle  plus  haut,  et  qu'il  ne  veut  pas  que  nous  soyons  ici  retenus.  Que  nous  apprenions  donc  par  ce  moyen  d'estre  solicitez  a  cercher  en  premier  lieu  que  Dieu  regne,  et  qu'il  gouverne,  que  nous  soyons  rengez  pleinement  a  luy  et  a  sa  iustice,  et  que  le  soin  de  ceste  vie  transitoire  ne  soit  point  pour  nous  eslourdir  comme  desia  nous  avons  monstre:  que  ce  ne  soit  (di-ie)  qu'un  accessoire  de  ce  principal  ou  il  nous  faut  parvenir,  a  scavoir  au  royaume  de  Dieu.  Bref,  cognoissons  que  Dieu  nous  a  mis  en  ce  monde  pour  semer,  c'est  a.  dire  a  fin  de  n'estre  point  oisifs  ni  inutiles.  Et  comment?  Il  est  vray  que  les  ministres  de  la  parole  doivent  semer  pour  recueillir  une  moisson  qu'ils  presentent  a  Dieu,  comme  une  offerte  sacree.  Or  leur  semence  c'est  d'enseigner  fidelement,  a  fin  que  la  parole  de  Dieu  fructifie,  et  que  son  nom  soit  glorifie  et  benit,  comme  aussi  nostre  Seigneur  Iesus  Christ  disoit  a  ses  Apostres,  Ie  vous  ay  eleus,  a  fin  que  vous  alliez,  et  que  vous  apportiez  un  fruict  permanent  et  qui  demeure  a  iamais.  Les  ministres  donc  ont  bien  cela  de  special  :  mais  tous  en  commun  nous  devons  semer  a  la  vie  eternelle,  c'est  a  dire  passans  par  ce  monde  comme  estrangers,  ayans  nos  sens  eslevez  a  cest  heritage  ou  doit  estre  nostre  repos,  et  la  aussi  ou  il  nous  faut  appliquer  toutes  nos  estudes.  Et  mesmes  quand  nous  travaillons  pour  la  nourriture  de  nos  corps,  que  ce  soit  tousiours  tendant  a  ce  but-la:  Comme  il  est  dit  que  nous  ne  devons  point  vivre  pour  boire  et  pour  manger:  mais  que  nous  buvions  et  mangeons  a  fin  d'estre  conduits  a  une  autre  vie.  Et  que  nous  ne  vivons  point  en  ce  monde  pour  nous  y  arrester:  mais  pour  parvenir  plus  haut,  c'est  a  scavoir  a  la  vie  celeste.  Puis  qu'ainsi  est  donc,  quand  un  homme  mesme  s'appliquer  pour  gagner  sa  vie,  soit  en  labeur,  soit  d'un  art  mechanique,  soit  un  marchant,  quoy  qu'il  en  soit,  quand  nous  aurons  le  soin  et  de  nos  personnes  et  de  nos  familles,  que  nous  tendions  plus  haut.  Car  de  faict  c'est  une  chose  mauvaise  si  un  homme  s'amuse  seulement  a  gagner  sa  vie,  et  qu'il  ne  regarde  point  de  servir  a  Dieu:  car  celuy  qui  gagne  sa  vie  doit  cependant  considerer,  Comment  est-ce  que  Dieu  approuve  ce  que  ie  fay?  Comment  aura-il  mon  service  agreable?  Or  ce  sera  quand  ie  ne  chemineray  point  selon  mes  cupiditez,  que  i'aviseray  de  ne  faire  tort  a  autruy,  que  ie  tascheray  de  m'employer  fidelement  a  ce  que  ie  suis  tenu.  Voila  (di-ie)  comment  nous  devons  semer,  c'est  a  scavoir  que  nous  ne  soyons  point  addonnez  a  ce  monde,  ni  retenus  ici  bas,  que  tousiours  nous  n'aspirions  a  la  vie  celeste.  Or  regardons  le  moyen  de  semer  ainsi:  c'est  de  semer  a  l'Esprit,  dit  sainct  Paul.