46:948  comme  trespassez.  Les  femmes  ont  eu  un  semblable  effroy  :  mais  l'Ange  puis  apres  adiouste  le  remede.  Quant  a  vous,  dit-il,  ne  craignez  point,  car  vous  cherchez  Iesus  qui  a  este  crucifie,  il  est  ressuscite  comme  il  a  dit.  Yci  nous  voyons  comme  Dieu  accepte  l'affection  et  le  zele  de  ces  femmes,  en  telle  sorte  qu'il  corrige  cependant  ce  qu'il  n'approuve  point.  I'enten  qu'il  le  corrige  par  la  bouche  de  l'Ange  qui  est  la  en  son  nom.  Nous  avons  dit  que  c'est  d'une  bonte  singuliere  que  Dieu  recoit  nostre  service  quand  il  est  imparfait,  veu  qu'il  le  pourroit  avoir  en  detestation.  Il  recoit  de  nous  donc  ce  qui  est  de  nulle  valeur,  comme  un  pere  recevera  de  ses  enfans  ce  qui  seroit  autrement  estime  comme  fatras  et  badinage.  Voyla,  di-ie,  comme  Dieu  nous  est  liberal:  mais  d'autre  coste  si  est-ce  qu'il  ne  veut  pas  que  les  hommes  se  plaisent  et  se  flattent  en  leurs  vices.  Voyla  pourquoy  l'Ange  corrige  ceste  imperfection  qui  est  aux  femmes:  et  encores  que  la  fin  ou  elles  tendent  soit  bonne,  si  est-ce  qu'elles  sont  condamnees  au  vice  particulier  qui  y  est.  Et  voyla  pourquoy  S.  Luc  recite  qu'elles  ont  este  plus  asprement  redarguees:  Qu'est-ce  que  vous  cherchez  le  vivant  avec  les  morts?  Mais  yci  nous  avons  a  observer  que  les  gend'armes  comme  gens  incredules  et  meschans,  qui  n'avoyent  nulle  crainte  de  Dieu  ne  religion,  ont  este  saisis  de  frayeur,  et  qu'ils  ont  eu  mesmes  comme  un  esprit  de  frenesie:  les  femmes  ont  bien  craint,  mais  elles  recoyvent  consolation  incontinent.  Voyla  donc  comme  la  maieste  de  Dieu  est  terrible  a  tous  ceux  ausquels  elle  apparoist:  c'est  pource  que  nous  sentons  nostre  fragilite  quand  Dieu  se  declare  a  nous:  et  au  lieu  qu'au  paravant  nous  estions  enflez  de  presomption,  et  avions  une  telle  audace  que  nous  ne  pensions  plus  estre  hommes  mortels,  quand  Dieu  nous  donne  quelque  signe  de  sa  presence,  il  faut  necessairement  que  nous  soyons  abbatus,  et  que  nous  cognoissions  quelle  est  nostre  condition,  c'est  ascavoir  que  nous  ne  sommes  que  terre  et  poudre,  et  toutes  nos  vertus  ne  sont  que  fumee  qui  s'escoule  et  s'esvanouit.  Cela  donc  est  commun  a  tous,  tant  bons  que  mauvais.  Au  reste,  quand  Dieu  a  ainsi  effraye  les  incredules,  il  les  laisse  la  comme  gens  reprouvez,  d'autant  qu'ils  ne  sont  pas  dignes  de  gouster  nullement  sa  bonte.  Et  voyla  aussi  pourquoy  ils  fuyent  sa  presence,  ils  se  despitent  et  grincent  les  dents,  et  sont  comme  enragez,  iusques  a  ce  qu'ils  perdent  tout  sens  et  raison,  se  rendans  comme  gens  abbrutis  du  tout.  Mais  les  fideles,  apres  avoir  este  espovantez,  se  relevent  et  prenent  courage,  voire  d'autant  que  Dieu  les  console  et  les  esiouit.  Ceste  crainte  donc  que  concoyvent  les  fideles  de  la  presence  de  la  maieste  de  Dieu  n'est  sinon  un  preparatif  d'humilite,  afin  qu'ils  luy  facent  l'hommage  qu'il  merite,  et  qu'ils  se  ran-