46:946  Marie  Magdalene  a  fait  la  conduite,  et  l'autre  Marie  est  yci  nommee  quant  et  quant,  pour  ce  qu'elle  suyvoit  Marie  Magdalene  de  plus  pres.  Cependant  elles  sont  venues  plusieurs  pour  oindre  le  corps  de  nostre  Seigneur  Iesus:  mais  notamment  il  est  yci  dit  -qu'elles  sont  venues  pour  veoir  le  sepulchre,  ascavoir  s'il  y  auroit  acces  et  entree.  Voyla  donc  pourquoy  deux  sont  yci  marquees  specialement.  Sainct  Matthieu  adiouste  que  l'Ange  leur  est  apparu,  combien  qu'il  y  en  eust  deux.  Mais  pource  qu'un  seul  portoit  la  parolle,  voyla  pourquoy  il  est  ainsi  nomme  par  especial.  Finalement  comme  elles  s'en  alloyent,  elles  rencontrent  nostre  Seigneur  Iesus  qui  les  envoye  a  ses  disciples,  afin  que  tous  soyent  assemblez  en  Galilee,  voulant  la  leur  monstrer  sa  resurrection:  et  ce,  pource  que  la  ville  de  Ierusalem  s'estoit  privee  par  sa  malice  d'un  tel  tesmoignage.  Vray  est  qu'encores  n'a-elle  pas  laisse  depuis  d'estre  la  fontaine  de  vie:  car  de  la  est  procedee  la  Loy  et  la  parolle  de  Dieu:  mais  cependant  si  est-ce  que  nostre  Seigneur  Iesus  n'a  point  voulu  se  declarer  a  ses  disciples  en  ceste  ville-la,  quand  la  malice  y  estoit  encores  si  fraiche.  Et  d'autre  coste  il  a  aussi  voulu  se  conformer  a  leur  rudesse:  car  ils  estoyent  comme  saisis  d'estonnement,  en  sorte  que  le  regard  ne  leur  eust  point  suffi,  sinon  qu'il  les  eust  retirez  a  part  et  se  fust  monstre  d'une  telle  sorte  -qu'ils  fussent  plenement  certifiez.  Or  nous  voyons  encores  yci  comme  les  femmes  qui  sont  nommees  n'ont  pas  laisse  encores  de  porter  reverence  a  nostre  Seigneur  Iesus  Christ  comme  a  leur  maistre,  combien  qu'elles  fussent  troublees  de  sa  mort:  et  par  consequent  nous  pouvons  bien  iuger  que  la  parolle  de  Dieu  estoit  tousiours  enracinee  en  leurs  coeurs.  Car  combien  que  leur  foy  fust  debile,  si  est-ce  qu'elles  cherchent  nostre  Seigneur  Iesus  au  sepulchre.  Il  y  a  aussi  en  elles  de  l'ignorance  qui  ne  se  peut  excuser:  car  elles  devoyent  desia  lever  leurs  esprits  en  haut,  attendans  la  resurrection  qui  leur  avoit  este  promise:  veu  que  le  troisieme  iour  leur  estoit  notamment  assigne.  Elles  sont  donc  tellement  occupees  qu'elles  ne  comprenent  pas  ce  qui  estoit  le  principal:  ascavoir  que  nostre  Seigneur  Iesus  devoit  obtenir  victoire  par  dessus  la  mort,  pour  nous  acquerir  vie  et  salut.  Ie  di  que  c'est  le  principal,  pource  que  sans  cela  l'Evangile  ne  seroit  rien  (comme  dit  S.  Paul)  et  nostre  foy  seroit  du  tout  aneantie.  Ainsi  ces  povres  femmes,  quelque  affection  qu'elles  ayent  au  Fils  de  Dieu,  et  combien  qu'elles  scachant  que  l'Evangile  qui  leur  a  este  presche  soit  la  pure  verite,  neantmoins  elles  sont  tellement  troublees  et  confuses  qu'elles  ne  comprenent  pas  qu'il  doyve  ressusciter:  et  ainsi  elles  vienent  au  sepulchre  avec  leurs  onguents  aromatiques.  Il  y  a  donc  du  vice  qui  est  60