46:940  miseres,  et  qu'il  semble  que  iournellement  il  soit  crucifie  en  ses  membres,  comme  a  la  verite  les  meschans,  en  tant  qu'en  eux  est,  le  crucifigent:  que  nous  ne  defaillions  point  pour  cela,  scachans  que  nous  ne  pouvons  estre  frustrez  de  ce  qui  nous  est  promis  en  la  doctrine  de  l'Evangile:  et  que,  combien  qu'il  nous  faille  passer  parmi  beaucoup  d'afflictions,  toutesfois  nous  regardions  tousiours  a  nostre  Chef.  Ioseph  et  Nicodeme  n'avoyent  point  cest  avantage  que  nous  avons  auiourd'huy:  c'est  de  contempler  la  vertu  de  l'Esprit  de  Dieu,  qui  s'est  monstree  en  la  resurrection  de  nostre  Seigneur  Iesus  Christ,  et  si  est-ce  qu'encores  leur  foy  pour  cela  n'a  pas  este  du  tout  amortie.  Maintenant  puis  que  nostre  Seigneur  Iesus  nous  appelle  a  soy,  et  qu'a  haute  voix  il  nous  declare  qu'il  est  monte  au  ciel,  afin  de  nous  y  recueillir  tous  ensemble,  que  nous  persistions  constamment  a  le  chercher  et  a  le  suyvre,  et  qu'il  ne  nous  face  point  mal  de  mourir  avec  luy  pour  estre  participans  de  sa  gloire.  Or  S.  Paul  nous  exhorte  a  estre  conformez  a  Iesus  Christ,  non  seulement  quant  a  sa  mort  mais  aussi  quant  a  sa  sepulture.  Car  il  y  en  a  d'aucuns  qui  seroyent  contens  de  mourir  avec  nostre  Seigneur  Iesus  pour  une  minute  de  temps,  mais  a  la  longue  ils  s'ennuyent.  Et  pour  ceste  cause  i'ay  dit  qu'il  ne  nous  faut  point  seulement  mourir  pour  un  coup,  mais  il  nous  faut  souffrir  patiemment  d'estre  ensevelis  iusques  a  la  fin.  I'appelle  mourir  quand  Dieu  veut  que  nous  endurions  ainsi  pour  son  nom:  car  encores  que  nous  ne  soyons  pas  du  premier  coup  trainez  au  feu  ni  condamnez  du  monde,  si  est-ce  que,  quand  nous  sommes  affligez,  voyla  desia  une  espece  de  mort  qu'il  nous  faut  endurer  patiemment.  Mais  pource  que  nous  ne  sommes  pas  si  tost  humiliez,  il  faut,  que  nous  soyons  batus  a  la  longue,  et  la  il  nous  faut  tenir  bon  et  persister  en  patience.  Car  comme  le  diable  ne  cesse  de  tousiours  machiner  ce  qu'il  luy  est  possible  pour  nous  distraire  et  desbaucher,  ainsi  faut-il  que  tout  le  temps  de  nostre  vie  nous  ne  cessions  de  combatre  a  l'encontre  de  luy.  Et  combien  que  ceste  condition  soit  dure  et  fascheuse,  attendons  que  le  temps  soit  venu  que  Dieu  nous  appelle  a  soy,  et  que  nons  ne  soyons  iamais  lassez  de  faire  confession  de  nostre  foy,  et  qu'en  cela  nous  ensuyvions  Nicodeme,  non  pas  en  sa  timidite.  Quand  il  est  venu  auparavant  au  Seigneur  Iesus  Christ,  il  s'estoit  cache,  et  n'osoit  pas  se  monstrer  vray  disciple,  mais  quand  il  est  venu  pour  ensevelir  nostre  Seigneur  Iesus,  ii  a  declare  et  proteste  qu'il  estoit  du  nombre  et  de  la  compagnie  des  fideles.  Puis  qu'ainsi  est  que  nous  l'ensuyvions  auiourd'huy  en  telle  constance.  Et  combien  que  nostre  Seigneur  Iesus  avec  la  doctrine  de  son  Evangile  soit  hay  du  monde,  voire  qu'on  l'ait  en  detestation,  que  nous