44:94  verba  Iehovae.  Quomodo?  nempe  inquit,  Ad  verba  Chaggai  prophetae,  sicuti  miserat  ipsum  Iehova  Deus  eorum.  Poterat  brevius  dicere  operam  suam  non  caruisse  profectu.  Sed  hoc  circuitu  sermonis  utitur,  ut  confirmet  magis  suam  vocationem:  idque  facit  non  absque  consilio,  quoniam  longo  tempore  destiterat  populus  audire  Dei  prophetas,  quum  scilicet  nulli  tunc  exstarent.  Interea  tamen  nihil  de  se  praedicat  Haggaeus,  quod  non  pertineat  communiter  ad  omnes  ecclesiae  doctores.  Scimus  enim  non  ideo  excitari  divinitus  homines  qui  loquantur,  ut  Deus  ipse  taceat.  Quum  ergo  ministri  doctrinae  nihil  Dei  autoritati  derogent,  sequitur  non  nisi  unum  Deum  audiendum  esse.  Ergo  non  est  singulare  elogium,  quod  ad  unum  hominem  restringi  debeat,  quum  dicitur  per  os  Haggaei  loquutus  esse  Deus:  sed  hoc  modo  declarat  ipse  Haggaeus  se  verum  et  legitimum  Dei  prophetam.  Colligere  igitur  licet  ex  his  verbis,  non  ideo  regi  externa  verbi  praedicatione  ecclesiam,  quasi  Deus  homines  substituat  in  suum  locum,  atque  ita  se  spoliet  proprio  officio:  sed  ut  tantum  per  os  ipsorum  loquatur.  Huc  etiam  pertinet  ista  loquutio,  Audivit  populus  vocem  Iehovae  Dei  sui,  et  verba  Chaggai  prophetae.  Neque  enim  hic  sermo  Dei  a  prophetae  verbis  discernitur,  quasi  addiderit  propheta  quidquam  de  suo.  Verba  igitur  haec  quae  sibi  tribuit  Haggaeus  non  commentus  est  ex  proprio  capite,  ut  ita  corrumperet  puram  doctrinam,  quae  a  Deo  tradita  fuerat:  sed  tantum  distinguit  inter  Deum  autorem  doctrinae  et  ministrum,  quemadmodum  quum  dicitur,  Gladius  Dei  et  Gedeonis  :  item  Credidit  populus  Deo  et  Mosi  servo  eius:  hic  neque  Mosi  neque  Gedeoni  quidquam  seorsum  a  Deo  tribuitur,  sed  Deus  ipse  locatur  m  summo  gradu  :  deinde  adiungitur  Moses,  adiungitur  etiam  Gedeon.  Et  eodem  sensu  scribunt  apostoli  visum  spiritui  sancto  esse,  et  sibi.  Unde  etiam  clare  apparet  quam  fatui  et  ridiculi  sint  papistae,  quum  inde  colligunt  licere  hominibus  addere  sua  commenta  verbo  Dei.  Nam  apostoli,  inquiunt,  non  modo  praetexunt  autoritatem  spiritus  sancti,  sed  dicunt  ita  sibi  etiam  esse  visum.  Deus  ergo  non  ita  sibi  vendicat  omnia,  quin  relinquat  aliquas  partes  suae  ecclesiae:  quasi  vero  apostoli  aliud  voluerint  quam  quod  hic  propheta  noster,  nempe  se  fideliter  et  per  manus  tradere  quod  a  spiritu  Dei  acceperant.  Haec  igitur  ratio  loquendi  diligenter  notanda  est,  quum  audimus  vocem  Dei  fuisse  reverenter  exceptam  a  populo  et  verba  Haggai  :  Quomodo  ?  sicuti  miserat  eum  Deus,  inquit:  quasi  diceret  Deum  auditum  esse,  quum  per  os  hominis  loquutus  est.  Et  hoc  etiam  notatu  dignum:  quia  multi  fanatici  homines  iactant  se  reverentiam  deferre  verbo  Domini,  sed  nolle  fidem  suam  subiicere  hominibus,  quia  etiam  hoc  esset  praeposterum:  et  obtendunt  hoo  modo  transferri  ad  creaturas  quod  proprium  est  Dei  unius.