35:94  mettre  sous  ce  sacrifice  qu'il  a  offert,  nous  sommes  tenus  et  reputez  pour  iustes,  a  cause  que  ce  sacrificela  a  eu  ceste  vertu  pour  abolir  toutes  nos  fautes  et  offenses.  Voila  ce  qu'il  nous  faut  ici  observer.  Toutes  fois  et  quantes  donc  que  nous  lisons  en  l'Escriture  saincte  ou  bien  que  nous  venons  au  sermon,  quand  quelque  promesse  de  la  bonte  de  Dieu  nous  est  mise  au  devant:  que  nous  sachions  Voici  Dieu  qui  nous  rend  tesmoignage  de  son  amour'  afin  que  nous  soyons  delivrez  de  la  mort  en  laquelle  nous  estions  plongez.  Et  combien  que  nous  n'oyons  qu'un  homme  mortel  qui  parle,  et  que  sa  voix  ne  soit  qu'un  son  qui  s'espard  et  s'esvanouist  en  l'air:  si  faut-il  que  nous  concluyons  que  Dieu  besongnera  par  sa  vertu  en  telle  sorte,  que  ceste  doctrine  sera  suffisante  pour  nous  delivrer  de  la  damnation  en  laquelle  nous  sommes,  et  de  la  servitude  de  peche:  que  nous  sortirons  des  liens  de  Satan,  que  nous  serons  absous  devant  nostre  Dieu,  que  ceste  parole  ne  nous  peut  faillir,  Tout  ce  que  vous  aurez  deslie  en  terre,  sera  aussi  bien  deslie  aux  cieux.  Et  ainsi  nous  voyons  de  quelle  importance  est  ce  mot,  quand  il  est  dit,  Delivre  le  pecheur:  car  c'est  autant  comme  si  la  voix  de  Dieu  resonnoit  du  ciel  quand  il  donne  charge  expresse  a  ceux  qui  parlent  a  nous,  qu'ils  nous  retirent  des  abysmes  de  mort  pour  entrer  en  paradis.  Et  defait  saint  Iaques  parlant  a  des  personnes  privees  dit  (5,  20),  Que  celuy  qui  admonneste  son  frere,  sauvera  une  ame  qui  estoit  perdue.  Si  cela  est/  en  tous  ceux  qui  reduisent  au  bon  chemin  les  desbauchez:  que  sera-ce  quand  nous  aurons  ceste  signature  especiale,  que  nostre  Seigneur  Iesus  a  donne  a  sa  parole,  lors  qu'elle  nous  est  preschee  par  les  Pasteurs  de  l'Eglise?  c'est  assavoir  que  leur  office  est  de  remettre  et  pardonner  les  pechez,  comme  desia  nous  avons  allegue  de  S.  Iean:  et  de  lier  et  deslier,  comme  nous  avons  allegue  de  S.  Matthieu.  En  somme  nous  voyons  quelle  est  la  vertu  de  l'Evangile,  quand  nous  recevons  par  foy  les  promesses  qui  y  sont  contenues:  que  c'est  autant  comme  si  Dieu  nous  tendoit  la  main  du  ciel  pour  nous  faire  sortir  des  abysmes  de  mort.  Or  notons  cependant  pour  le  troisieme  article,  que  ceci  ne  se  fait  sinon  d'autant  que  Dieu  l'a  ordonne.  Et  c'est  pour  distinguer  l'Evangile  d'avec  les  blasphemes  du  Pape:  car  le  Pape  dira  bien  que  luy  et  sa  Prestraille  ont  les  clefs  du  royaume  des  cieux,  qu'ils  ont  l'office  de  pardonner.  Mais  quelle  commission  ont-ils  de  tout  cela?  Car  ils  attachent  la  remission  des  pechez  a  leur  confesse.  Et  ou  est-ce  que  iamais  Dieu  a  declare,  qu'il  se  faille  confesser  de  tous  ses  secrets  en  l'aureille  d'un  homme  pour  obtenir  merci?  Dieu  declare  que  quand  le  pecheur  gemira,  il  le  regardera  en  pitie.  Or  voila  un  homme  mortel  qui  presume  d'imposer  une  loy,  et  de  clorre  la  porte  de  paradis,  sinon  qu'on  Tob-