30:94  Deus  etiam  tanquam  ebriosos  deiicit,  et  stultam  illam  audaciam  deprimit,  qua  super  ipsas  nubes  efferebantur.  Itaque  nulla  tanta  est  audacia  quae  firmo  nitatur  fundamento,  nisi  quae  ex  fide  promanat:  quum  nimirum  de  Dei  voluntate  persuasi  sumus,  eique  morem  gerimus,  eiusque  promissis  stamus,  quibus  se  cultum  nostrum,  quo  nos  ad  ipsius  voluntatem  conformare  nitimur  gratum  habiturum,  et  felicem  illi  successum  largiturum,  pollicetur.  Tum  sane  vere  fortes  et  magnanimi  futuri  sumus,  et  invictam  constantiam  retenturi,  quum  fides  nostra  puro  puto  Dei  verbo  nitetur.  Contra  vero  nostra  incredulitas  patefiet,  quum  trepidabimus,  et  incerti  ac  dubii  rerum  eventum  incertum  metuemus.  Ubicunque  enim  vera  fides  sedem  fixit,  nulla  superest  dubitatio,  nulla  mentis  trepidatio.  Hanc  ob  causam  apud  prophetam  legimus  veros  doctores  mitti,  qui  labantia  genua  confirment,  et  debiles  corroborent  :  ut  doceamur  Dei  verbo  vim  hanc  inesse,  ut  nos  ad  faciendum  officium  idoneos,  et  ad  obedientiam  praestandam  habiles  efficiat.  Quamobrem  donec  Deus  nos  invicta  sancti  sui  spiritus  virtute  cinxerit,  viribus  omnibus  deficiemur,  enervabimur  ac  debilitabimur,  ut  simus  ad  opus  quodlibet  aggrediendum  inutiles.  Hanc  igitur  doctrinam  eruamus  ex  hoc  loco,  et  mentibus  nostris  altius  infigamus,  quum  dicitur  Saul  in  bellum  cum  populo  progressus,  tam  facilem  victoriam  obtinuisse,  Deo  sic  secundante  ipsius  conatus,  ut  re  ipsa  apparuerit  Deum  huius  belli  summum  imperatorem  fuisse,  et  adversus  ipsos  hostes  dimicasse,  ut  antea  audivimus  ex  Mose,  Deum  se  ultorem  fore  et  poenas  de  tam  ingrata  et  maledicta  gente  sumpturum  iam  olim  fuisse  com  minatum.  Quamobrem  hinc  discamus  sub  auspiciis  Domini  ambulare,  persuasi  nos,  nihil  nisi  quod  Deus  iusserit  suscipientes,  semper  felicem  exitum  sortituros  consiliorum,  quandoquidem  promisit  se  nostram  obedientiam  gratam  habiturum,  eique  prosperos  successus  daturum.  Deinceps  vero  Saulis  et  populi  transgressio  memoratur.  Laudatus  quidem  hactenus  Saul,  quod  strenuam  navasset  operam  in  exsequendis  Dei  mandatis:  sed  iam  tam  turpis  lapsus  ipsius  describitur,  ut  propterea  Dominus  illum  exauctorarit,  immo  plane  reiecerit,  ut  in  sequentibus  visuri  sumus.  Verum  enimvero  prima  fronte  non  usque  adeo  grave  peccatum  istud  videbitur,  quod  tam  severe  puniretur.  Nam  et  ipse  se  Saul  occurrens  Samueli,  tanquam  re  bene  gesta  iactat,  et  se  velut  irreprehensibilem  gloriatur,  quum  ait,  praestiti  verbum  Iehovae.  Quibus  verbis  victoriam  suam  Samueli  probare  tanquam  laudabilem  nititur,  et  tanquam  rex  strenuus  et  fortis  laudari  ab  illo  cupit,  quandoquidem  mandata  sibi  esset  exsequutus.  Verum  et  Saul  et  populus  graviter  erant  lapsi,  peccatum  tamen  non  agnoscentes,  sed  potius  praeclare  se  officio  functos