46:936  passion  de  nostre  Seigneur  Iesus,  et  que  iournellement  la  memoire  nous  en  soit  rafreschie:  quand  Dieu  nous  monstre  a  l'oeil  combien  a  valu  cela  que  du  coste  de  nostre  Seigneur  Iesus  Christ  soit  procede  sang  et  eau.  Ainsi  c'est  en  somme  ce  que  nous  avons  a  retenir  touchant  ce  qui  est  dit  que  le  coste  de  nostre  Seigneur  Iesus  Christ  a  este  perce.  Voire  et  en  ce  mot,  quand  il  est  dit  que  l'Escriture  a  este  accomplie,  que  nous  cognoissions  ce  qui  a  este  dit  plus  au  long  par  ci  devant,  que  le  tout  a  este  gouverne  par  le  conseil  secret  de  Dieu,  et  combien  que  les  gendarmes  ne  sceussent  ce  qu'ils  faisoyent,  si  est-ce  que  Dieu  a  cependant  mis  en  effet  et  execution  ee  qu'il  avoit  prononce  tant  par  Moyse  que  par  son  Prophete  Zacharie.  Nous  avons  desia  veu  le  tesmoignage  d'Exode:  S.  Iehan  adiouste  aussi  bien  du  Prophete  Zacharie,  Ils  verront  celuy  qu'ils  ont  perce.  Il  est  vray  que  Dieu  use  la  de  similitude,  car  il  despite  les  contempteurs  de  sa  Parolle  qui  estoyent  endurcis  en  toute  rebellion  et  malice.  Et  bien,  dit-il,  il  leur  semble  qu'ils  font  la  guerre  aux  hommes  qui  preschent  ma  Parolle,  et  qu'ils  les  pourront  empescher  par  ce  moyen-la.  Or  c'est  contre  moy  qu'ils  bataillent,  et  quand  ils  mesprisent  ainsi  et  reiettent  ma  Parolle,  c'est  comme  s'ils  me  navroyent  de  coups  de  poignard:  aussi  ils  verront  celuy  qu'ils  ont  perce.  Mais  cela  a  este  vrayement  accompli  en  la  personne  de  nostre  Seigneur  Iesus  Christ:  car  mesmes  en  son  corps  humain  il  a  este  perce.  Voyla  donc  comme  il  a  este  declare  le  Dieu  vivant  qui  avoit  parle  de  tout  temps  par  ses  Prophetes,  puis  qu'en  sa  personne  tout  ce  qui  avoit  este  prononce  se  voit.  Or  il  est  dit  consequemment  que  Ioseph,  ayant  obtenu  de  Pilate  que  le  corps  de  Iesus  .Christ  fust  oste  de  la  croix,  et  qu'il  luy  fust  donne  pour  Pensevelir,  a  eu  un  linceul  pur  et  a  achete  aussi  des  onguens  aromatiques  (voire  pour  une  grande  somme,  comme  il  appert  par  S.  Iehan)  de  mirrhe  et  d'aloes,  et  qu'il  l'a  enseveli  en  un  sepulchre  nouveau  qu'il  avoit  fait  pour  soy,  lequel  estoit  cave  en  un  rocher.  En  ceste  sepulture  nostre  Seigneur  Iesus  Christ  a  desia  commence  de  monstrer  l'issue  de  sa  mort:  c'est  qu'il  devoit  bientost  venir  en  la  gloire  de  sa  resurrection,  et  Dieu  a  voulu  quant  et  quant  manifester  cela.  Voyla  donc  encores  un  tesmoignage  infalible,  qu'en  tant  de  confusions  que  nous  lisons  en  ceste  histoire,  qui  nous  pourroyent  troubler  et  esbranler  nostre  foy,  nous  appercevons  que  Dieu  a  eu  tousiours  le  soin  de  son  Fils  unique  comme  du  chef  de  l'Eglise,  et  de  son  Bien-aime:  non  seulement  afin  que  nous  puissions  esperer  en  luy,  mais  que  nous  attendions  quant  et  quant,  puis  que  nous  sommes  membres  de  son  corps,  que  le  soin  paternel