46:930  nourrir  paisiblement  et  a  leur  aise.  Quand  donc  elles  tracassent  ainsi  sans  pouvoir  trouver  logis  sinon  avec  difficulte,  qu'il  faut  qu'elles  ayent  faim  et  soif,  qu'elles  soyent  suietes  a  beaucoup  de  mocqueries,  qu'on  les  dechasse  et  moleste  par  tout,  et  que  neantmoins  elles  surmontent  tout  cela  et  le  portent  en  patience,  nous  pouvons  aisement  iuger  comme  Dieu  les  avoit  fortifiees.  Or  tant  y  a  qu'a  la  mort  encores  elles  declarent  l'esperance  qu'elles  ont  eu  en  nostre  Seigneur  Iesus  Christ.  Car  combien  qu'elles  fussent  esperdues,  tant  y  a  que  si  elles  eussent  repute  que  c'estoit  fait  de  nostre  Seigneur,  elles  pouvoyent  quant  et  quant  iuger  qu'il  les  avoit  trompees.  Car  il  leur  avoit  parle  du  Royaume  de  Dieu  qui  devoit  estre  restaure  par  son  moyen:  il  leur  avoit  parle  de  la  parfaite  felicite  et  du  salut  lequel  il  devoit  accomplir.  Et  ou  est-ce  que  sont  toutes  ces  choses?  Nous  voyons  donc  comme  ces  povres  femmes,  combien  qu'elles  ayent  este  esperdues  et  qu'elles  se  soyent  peu  troubler,  ne  scachans  quelle  seroit  l'issue  de  nostre  Seigneur  Iesus,  neantmoins  ont  este  retenues  par  son  authorite:  et  pourtant  il  fait  qu'en  la  fin  elles  peuvent  cognoistre  et  iuger  qu'il  ne  leur  avoit  rien  promis  en  vain.  Elles  ont  donc  attendu  la  promesse  de  la  resurrection,  combien  que  selon  les  hommes  elles  peussent  iuger  tout  au  rebours.  Et  cependant  nous  voyons  comme  leur  foy  a  este  exercee,  afin  que  nous  ne  soyons  pas  troublez  outre  mesure,  si  en  apparence  il  semble  que  nous  soyons  delaissez  de  Dieu,  et  que  toutes  les  promesses  de  l'Evangile  soyent  comme  abolies,  mais  que  nous  persistions  neantmoins.  Car  ces  femmes-ci  rendent  tesmoignage  contre  nous,  et  a  nostre  grande  condamnation,  si  nous  defaillons  en  tels  combats.  Voudrions-nous  un  examen  plus  rude  que  celuy  qu'elles  ont  endure?  Tant  y  a  qu'elles  ont  este  victorieuses,  voire  par  le  moyen  de  la  foy.  Ainsi  donc  armons-nous  quand  nous  sommes  advertis  des  assauts  que  nous  fait  Satan:  qu'avant  coup  nous  soyons  munis,  et  que  nous  monstrions  que  nous  sommes  tellement  appuyez  sur  la  vertu  de  nostre  Seigneur  Iesus  Christ  qu'encores  que  nous  n'appercevions  pas  du  premier  coup  l'accomplissement  de  ce  qui  nous  est  dit,  nous  ne  laissions  pas  de  nous  reposer  en  luy,  et  luy  porter  cest  honneur  et  reverence,  qu'il  se  monstrera  fidele  en  la  fin.  Et  nous  avons  besoin  d'estre  ainsi  esprouvez  iusques  au  bout.  Car  autrement  nous  serions  par  trop  delicats,  et  mesmes  nostre  foy  seroit  amortie,  ou  bien  nous  forgerions  un  paradis  terrestre,  et  nos  sens  ne  pourroyent  point  s'eslever  si  haut  pour  renoncer  a  ce  monde.  Comme  aussi  nous  le  voyons  mieux  en  la  personne  de  la  mere  de  Iehan  et  de  Iaques.  Nous  scavons  qu'auparavant  elle  avoit  este  menee  d'une  telle  ambition  qu'elle  eust  voulu  que  59