27:93  93  SUR  LE  DEUTER  CHAP.  XI.  94  voit  que  Dieu  besongne  du  ciel:  encores  faut-il  que  les  plaintes  se  dressent  contre  Moyse  et  Aaron,  qu'on  leur  iette  le  chat  aux  iambes,  et  qu'on  leur  mette  la  rage  sus,  comme  on  dit.  Quand  cela  est,  ne  faut-il  pas  qu'il  y  ait  une  horrible  durte  en  ce  peuple?  Or  pensons  a  nous.  Car  auiourd'huy  nous  sommes  coulpables  en  est  endroict  d'une  telle  malice.  Comme  nous  en  verrons  qui  s'enveniment,  s'addonnans  a  une  mauvaise  cause  :  voire,  et  ne  sachans  pourquoy.  Si  on  leur  demande,  et  quel  profit?  ils  ne  savent,  sinon  que  le  diable  les  a  transportez  iusques  la,  qu'ils  sont  bien  aises  de  maintenir  une  mauvaise  cause,  et  de  murmurer,  et  se  despitter:  et  cependant  on  se  ruera  sur  ceux  qui  n'en  peuvent  mais,  pource  que  nous  avons  tasche  de  maintenir  ce  qui  estoit  de  Dieu.  Avons-nous  pretendu  a  ce  que  Dieu  a  fait  sans  l'attente  des  hommes?  Il  a  besongne  cependant  que  nul  n'y  pensoit:  il  n'y  avoit  ne  Iuges,  ne  peuple,  ne  Ministres  de  la  parolle  qui  iamais  eussent  pense  ce  qui  est  advenu.  La  chose  est-elle  faite?  Et  que  ne  cognoissons-nous  que  nostre  Seigneur  a  eu  pitie  de  nous  en  la  fin?  Et  que  cependant  il  nous  a  voulu  instruire,  et  qu'il  veut  qu'il  y  ait  un  memorial  perpetuel  de  cest  acte-la:  que  nous  cognoissions  qu'il  a  leve  sa  main  pour  nous  humilier,  afin  que  doresenavant  nous  cheminions  en  toute  subiection  sous  luy,  et  selon  son  ordre.  Ceux  qui  n'en  peuvent  faire  leur  profit,  ne  sont-ils  pas  plus  qu'inexcusables?  Il  est  bien  certain:  car  c'est  comme  clorre  les  yeux  aux  oeuvres  de  Dieu  d'une  certaine  malice.  Mais  il  ne  se  faut  point  esbahir,  si  les  choses  sont  auiourd'huy  tant  confuses.  Car  on  voit  qu'au  pays  de  l'Evangile  il  y  a  une  licence  plus  desbordee,  et  plus  villaine  qu'entre  les  Papistes.  Et  en  cela  il  nous  faut  cognoistre,  que  c'est  une  iuste  reprobation  de  Dieu:  car  il  faut  que  ceux  qui  ont  entendu  l'Evangile,  et  qui  n'y  veulent  point  croire,  que  ceux-la  soyent  tousiours  diables  encharnez,  et  qu'ils  soyent  comme  monstres,  et  qu'on  ne  voye  en  eux  sinon  une  enormite  execrable.  Il  est  vray  que  les  Papistes,  d'autant  qu'ils  sont  ennemis  mortels  de  Dieu,  meritent  bien  d'estre  en  sens  reprouve,  comme  ils  le  sont:  mais  ceux  qui  se  vantent  de  l'Evangile,  et  s'en  mocquent,  et  mesmes  repoussent  toute  bonne  doctrine,  et  bataillent  a  l'encontre  de  Dieu,  ne  faut-il  pas  qu'il  desploye  envers  eux  une  plus  grande  rigueur,  comme  on  le  voit?  Et  il  ne  faut  point  ietter  l'oeil  loin:  qu'on  contemple  seulement  a  l'entour,  et  nous  verrons  que  la  vengeance  de  Dieu  s'est  desbordee  iusques  au  bout  sur  ces  malheureuses  creatures,  qui  reiettent  ainsi  sa  grace  qui  leur  est  iournellement  offerte.  Si  donc  ceux-la  s'enveniment  ainsi  contre  tout  bien,  que  profitent-ils,  sinon  qu'ils  amassent  tousiours  une  plus  griefve  punition  sur  leurs  testes?  Mais  de  nostre  coste,  que  nous  appre-