46:926  Car  nous  sommes  asseurez  que  non  seulement  le  Fils  de  Dieu  a  bataille  pour  nous,  mais  que  la  victoire  qu'il  nous  a  acquise  nous  appartient,  et  qu'auiourd'huy  nous  ne  devons  estre  aucunement  effrayez  en  la  mort,  scachans  que  la  malediction  de  Dieu,  laquelle  nous  estoit  espovantable,  est  abolie,  et  que  la  mort,  au  lieu  qu'elle  nous  pouvoit  navrer  d'une  playe  mortelle,  nous  sert  de  medecine  pour  nous  donner  passage  a  la  vie.  Or  comme  auparavant  a  l'exemple  de  David  il  disoit,  Mon  Dieu,  mon  Dieu,  pourquoy  m'as-tu  laisse,  aussi  maintenant  il  prend  l'oraison  faite  par  David  au  Pseaume  trente  et  unieme,  Ie  te  recommande  mon  esprit.  Vray  est  que  David  disoit  cela  estant  au  milieu  des  dangers:  comme  s'il  disoit,  Seigneur  que  tu  m'ayes  en  ta  protection,  car  mon  ame  est  comme  entre  mes  mains,  elle  est  la  comme  a  la  volee:  car  ie  me  voy  expose  a  tous  hazars,  ma  vie  est  comme  pendante  d'un  filet:  il  ne  reste  donc  sinon  que  tu  me  prenes  en  ta  garde.  Voyla  comme  David  par  ceste  priere  constitue  Dieu  son  protecteur.  Mais  cependant  ii  n'a  pas  laisse  a  la  mort  mesmes  d'invoquer  Dieu,  et  s'asseurer  tousiours  que  Dieu  est  le  Sauveur  de  ses  eleus,  non  seulement  quant  a  les  maintenir  et  garentir  en  ce  monde,  mais  aussi  quand  il  les  retire  a  soy.  Car  c'est  la  principale  garde  que  Dieu  face  de  nous,  qu'estans  retirez  de  ce  monde  nous  soyons  cachez  sous  ses  ailes  pour  iouir  de  sa  presence,  comme  S.  Paul  en  parle  en  la  seconde  des  Corinthiens.  Nostre  Seigneur  Iesus  aussi  prononcant  ceste  priere  declare  qu'il  meurt  paisiblement,  ayant  vaincu  tous  les  combats  qu'il  avoit  a  soustenir  pour  nous,  et  fait  desia  ses  triomphes  en  nostre  nom  et  a  nostre  proufit  et  salut.  Quant  et  quant  il  declare  par  mesme  moyen  que  Dieu  est  son  Sauveur  et  qu'il  garde  son  ame  comme  un  bon  depost.  Car  c'est  ce  qu'emporte  ceste  requeste  qu'il  luy  fait,  quand  il  dit,  Mon  Dieu  tu  seras  gardien  de  mon  ame,  encores  apres  la  mort.  Quand  nostre  Seigneur  Iesus  parle  ainsi  c'est  autant  comme  s'il  nous  asseuroit  tous  que  nous  ne  pouvons  faillir  en  nous  remettant  a  nostre  Dieu,  puis  qu'il  daigne  bien  prendre  la  charge  de  nous,  afin  de  nous  maintenir,  et  que  nous  ne  perirons  iamais  estans  ainsi  sous  sa  main.  Or  quant  et  quant  nous  avons  a  noter  que  Iesus  Christ,  disant,  Mon  Dieu  ie  te  recommande  mon  esprit,  s'est  acquis  ce  privilege  qui  luy  est  attribue  par  S.  Estiene  au  7.  ch.  des  Actes:  c'est  qu'il  fust  constitue  gardien  de  toutes  nos  ames.  Car  comment  est-ce  que  sainct  Estiene  parle  en  sa  mort?  Seigneur  Iesus,  ie  te  recommande  mon  esprit.  Voyla  donc  S.  Estiene  qui  monstre  le  fruit  de  ceste  requeste  qui  a  este  faite  par  Iesus  Christ:  c'est  ascavoir  que  maintenant  nous  pouvons  nous  addresser  a  luy,  et  le  devons