46:924  repos.  Voyla  donc  pourquoy  il  n'a  pas  voulu  haster  sa  mort,  mais  s'est  rendu  paisible  et  obeissant,  iusques  a  ce  que  tout  fust  accompli:  voire  combien  qu'il  n'ait  pas  encores  rendu  l'Esprit,  et  ne  soit  pas  ressuscite.  Car  il  veut  dire  que  iusques  a  ceste  heure  il  avoit  monstre  une  plene  obeissance,  tellement  que  rien  n'empeschoit  qu'il  ne  rendist  maintenant  son  ame  a  Dieu  son  Pere.  Voyla  donc  comme  il  nous  faut  prendre  ce  passage:  c'est  que  nostre  Seigneur  Iesus  a  declare  que  rien  ne  defailloit  plus  pour  nostre  redemption  excepte  de  partir  du  monde,  ce  qu'il  estoit  prest  et  appareille  de  faire,  et  de  rendre  son  ame  a  Dieu.  Voyant  donc  qu'il  s'estoit  acquitte  de  tout  devoir  de  Mediateur,  et  qu'il  avoit  fait  tout  ce  qui  estoit  requis  pour  appaiser  envers  nous  l'ire  de  Dieu,  et  que  la  satisfaction  de  nos  pechez  estoit  accomplie,  il  a  voulu  demander  ce  bruvage.  Or  nous  avons  yci  une  sentence  bien  notable  et  excellente,  quand  il  est  dit  que  tout  est  accompli.  Car  il  est  certain  que  le  Seigneur  Iesus  ne  parle  point  d'une  chose  petite  ne  vulgaire:  mais  il  entend  qu'en  sa  mort  nous  avons  tout  ce  qu'il  nous  faut  chercher  pour  avoir  entree  a  Dieu  et  pour  obtenir  grace  de  luy.  Non  pas  que  sa  resurrection  soit  exclue  par  cela,  mais  c'est  autant  comme  s'il  disoit  qu'il  a  fait  son  office  fidelement,  et  qu'il  n'est  pas  venu  pour  estre  Sauveur  en  partie,  mais  que  iusques  au  dernier  poinct  il  a  execute  la  charge  qui  luy  estoit  commise,  et  qu'il  n'a  rien  defailli  a  la  volonte  de  Dieu  son  Pere.  Puis  qu'ainsi  est  donc,  nous  sommes  instruits  d'arrester  plenement  nostre  fiance  en  nostre  Seigneur  Iesus  Christ,  cognoissans  $ue  toutes  les  parties  de  nostre  salut  sont  accomplies  en  ce  qu'il  a  fait  et  endure  pour  nous.  Et  voyla  aussi  pourquoy  sa  mort  est  appelee  Sacrifice  perpetuel,  par  lequel  les  fideles  et  eleus  do  Dieu  sont  sanctifiez.  Voulons-nous  donc  avoir  certitude  que  Dieu  nous  est  Pere?  Voulons-nous  avoir  liberte  de  l'invoquer?  Voulons-nous  avoir  repos  en  nos  consciences?  Voulons-nous  estre  plenement  certifiez  que  nous  sommes  tenus  pour  iustes  afin  d'estre  agreables  a  Dieu?  Demourons  en  Iesus  Christ  et  ne  vaguons  ne  ca  ne  la,  et  cognoissons  que  c'est  la  ou  gist  toute  perfection.  Ceux  donc  qui  veulent  d'autres  subsides,  et  qui  cherchent  de  coste  et  d'autre  pour  suppleer  a  ce  qui  pourroit  defaillir  a  la  mort  et  passion  de  nostre  Seigneur  Iesus  Christ,  renoncent  plenement  a  la  vertu  de  laquelle  nous  parlons  maintenant.  Brief,  ils  foullent  au  pied  le  sang  de  Iesus  Christ,  car  ils  le  deshonorent.  Et  maintenant  en  toute  la  Papaute  qu'y  a-il  sinon  un  renoncement  de  la  mort  et  passion  de  nostre  Seigneur  Iesus  Christ?  Car  autant  qu'ils  pensent  faire  de  bonnes  oeuvres,  pource  qu'ils  les  appellent  merites,  par  lesquels  ils  cuident  acquerir  grace  devant