58:92  il  leur  est  apparu:  auiourd'hui  nous  avons  la  Loy  qui  est  une  regle  infallible:  nous  avons  les  Prophetes  qui  nous  en  sont  expositeurs,  afin  que  la  brievete  ne  nous  soit  point  obscure:  nous  avons  encore  plus  de  perfection  en  l'evangile.  Quand  donc  Dieu  nous  a  revele  ce  qui  nous  estoit  utile  de  cognoistre,  il  ne  faut  pas  que  nous  appetions  auiourd'hui  des  visions  :  mais  toutesfois  et  quantes  que  nous  serons  en  quelque  doute  ou  perplexite,  recourons  a  l'escriture:  et  quand  nous  penserons  des  moyens,  regardons  si  cela  nous  est  permis,  et  si  Dieu  l'approuve.  Et  quand  nous  verrons  que  les  moyens  qui  nous  vienent  en  la  teste,  ne  sont  point  conformes  a  la  volonte  de  Dieu,  selon  qu'elle  est  contenue  en  la  Loy  et  en  l'evangile,  que  nous  quittions  la  tout.  Voila  comme  nous  avons  a  ensuivre  nostre  pere  Isaac,  voire  surmontant  ceste  tentation  qui  est  bien  fascheuse  et  pesante,  c'est  assavoir  que  nous  n'ayons  point  dequoy,  pour  estre  nourris  et  substantez,  sinon  bien  petitement.  Car  on  verra  souvent  les  incredules  avoir  trente  fois  plus  qu'il  ne  leur  faut,  on  les  verra  aussi  prodigues  et  dissolus,  qu'ils  iettent  a  l'abandon  tous  les  biens  de  Dieu,  et  mesme  ils  en  font  un  degast.  Les  povres  fideles,  quoy?  Ayans  travaille  pour  acquerir  leur  vie,  a  grand'peine  encore  trouveront-ils  en  fin  dequoy  acheter  du  pain.  Quand  donc  nous  voions  que  Dieu  veut  ainsi  esprouver  les  siens  souventesfois,  que  chacun  s'y  prepare,  et  que  nous  ne  soions  pas  degoustez,  encore  que  nostre  Seigneur  nous  traite  en  telle  rigueur  et  severite,  que  ce  ne  soit  pas  pour  estre  degoustez  neantmoins  de  ce  qu'il  nous  a  promis,  de  nous  tenir  pour  ses  enfans:  et  que  nous  cognoissions  que  l'office  de  nous  substanter  et  nourrir  lui  appartient,  et  qu'il  le  fera,  mais  non  point  a  nostre  souhait  et  a  nostre  fantasie.  Et  au  reste,  quand  nous  voions  que  Dieu  ne  nous  presse  point  iusques  la,  que  la  faim  ne  nous  chasse  point  au  haut  et  au  loin,  comme  on  dit,  cognoissons  qu'il  nous  supporte  d'autant,  a  cause  de  nostre  debilite.  C'est  en  somme  ce  que  nous  avons  a  retenir  quant  a  l'exemple  d'Isaac.  Or  on  pourroit  ici  faire  une  question,  Pourquoy  c'est  que  Dieu  a  permis  a,  nostre  pere  Abraham  d'  aller  en  Egypte,  et  il  le  defend  a  Isaac  son  fils.  Mais  sur  cela  nous  avons  a  noter  que  Dieu  cognoist  quels  nous  sommes,  quelle  est  nostre  portee,  et  selon  cela  aussi  il  ne  permet  point  que  nous  soions  tentez  outre  mesure:  comme  saint  Paul  en  parle,  l'appelant  fidele  en  cest  endroit.  Dieu  donc  cognoist  ce  qu'il  a  mis  en  nous:  car  ce  qui  y  est  de  nature  seroit  pour  nous  abysmer  tousiours:  mais  quand  il  nous  a  donne  quelque  vertu  de  son  saint  Esprit,  il  sait  si  c'est  en  petite  portion,  ou  plus  ample.  Selon  cela  aussi  il  exerce  nostre  Foy  et  nostre  patience:  et  quand  il  void  que  nous  sommes  debiles,  il  ne  permet  point  que  nous  soions  tentez  si  fort.  Voila  comme  il  en  est  avenu:  et