50:92  praeoccupat,  facit  ut  tali  Dei  admonitione  iam  non  sit  opus.  Quaeritur  autem,  ad  Paulumne,  an  ad  Deum  respicerent  Corinthii,  tam  in  hac  vendicta  quam  in  zelo,  desiderio  et  reliquis.  Respondeo  haec  omnia  poenitentiam  semper  comitari.  Terum  interest,  clam  coram  Deo  quis  peccaverit,  an  palam  coram  mundo.  Cuius  arcanum  est  peccatum,  satis  est  si  coram  Deo  ita  sit  affectus.  Ubi  autem  manifestum  est  peccatum,  requiritur  etiam  manifesta  poenitentiae  approbatio.  Ita  Corinthii,  qui  palam  et  cum  gravi  bonorum  offendiculo  deliquerant,  poenitentiam  suam  testari  necesse  habebant  his  signis.  Modis  omnibus  comprobastis  vos  puros  esse  in  negotio.  12.  Itaque  si  scripsi  vobis,  non  eius  causa  qui  laeserat,  neque  eius  causa  qui  laesus  fuerat,  scripsi:  sed  ut  palam  fieret  studium  vestrum  pro  nobis  apud  vos  in  conspectu  Dei.  13.  Idcirco  consolationem  accepimus  ex  consolatione  vestri.  Quin  uberius  etiam  gavisi  sumus  ob  gaudium  Titi,  quod  refocillatus  sit  eius  spiritus  ab  omnibus  vobis:  14  quod  si  quid  apud  illum  de  vobis  gloriatus  sum,  non  fuerim  pudefactus,  sed  ut  omnia  in  veritate  loquuti  sumus  vobis:  ita  et  gloriatio  nostra  apud  Titum  veritas  facta  est.  15.  Et  viscera  eius  maiorem  in  modum  erga  vos  affecta  sunt:  dum  memoria  repetit  vestram  omnium  obedientiam:  quemadmodum  cum  timore  et  tremore  exceperitis  eum.  16.  Gaudeo  quod  vobis  in  omnibus  confidam.  Comprobastis  vos  puros.  Vetus  interpres  legit:  exhibuistis:  Erasmus,  commendastis.  Tertium  praetuli  quod  mihi  videbatur  melius  quadrare,  veris  testimoniis  declarasse  Corinthios,  se  nequaquam  participes  esse  criminis,  cui  affines  esse  videbantur  propter  dissimulationem.  Testimonia  porro  qualia  fuerint,  iam  videmus.  Quamquam  non  prorsus  eos  excusat  Paulus,  sed  extenuat  eorum  peccatum.  Neque  enim  culpa  penitus  vacabat  nimia  tolerantia,  qua  usi  fuerant:  sed  eos  liberat  a  crimine  consensus.  Notandum  est  praeterea,  non  omnes  ad  unum  liberari  :  sed  ecclesiae  corpus  duntaxat.  Credibile  siquidem  est,  nonnullos  fuisse  conscios  ac  fautores.  Sed  quum  omnes  simul  infamia  laborarent:  postea  apparuit,  nonnisi  ad  paucos  culpam  pertinere.  12.  Itaque  si  scripsi.  Facit  quod  solent  qui  reconciliationem  quaerunt.  Vult  priora  omnia  sepulta  esse,  nihil  amplius  exprobrat,  nihil  reprehendit,  de  nulla  re  expostulat,  denique  omnium  obliviscitur  :  quia  contentus  est  sola  eorum  resipiscentia.  Et  sane  hic  rectus  est  modus,  non  ultra  urgere  peccatores,  ubi  ad  poenitentiam  adducti  fuerint.  Nam  si  adhuc  eorum  delicta  reducimus  in  memoriam,  malevolentia  potius  quam  pio  affectu,  aut  salutis  eorum  studio  impelli  certum  est.  Caeterum  haec  dicuntur  a  Paulo  per  concessionem:  nam  certe  suam