30:92  malum  in  bonum  convertere  ad  ecclesiae  suae  salutem  novit.  Saepe  etiam  eos  distinguit  et  separat  ab  improbis  qui  in  ipsius  timore  ambulant,  aut  quos  singulari  aliqua  gratia  affecit,  ut  periculis  illis  eripiat,  in  quae  reprobos  coniicit,  quos  a  fidelibus  separatos  ultimis  suppliciis  afficit.  Davidem  videmus  apud  Deum  querentem  precari,  ne  Deus  cum  incredulis  ipsum  comprehendat,  ne  in  illorum  numero  deprehendatur  quos  horrenda  Dei  vindicta  manet:  sed  in  ipsum  suam  potius  misericordiam  exserat.  Davidem  profecto  has  preces  fundentem  nixum  fuisse  divinis  promissionibus  certum  est,  et  hoc  principio  fultum,  Deum  nempe  qui  suorum  curam  gerit,  et  iustissimus  rerum  omnium  moderator  est,  non  puniturum  ipsum  temere,  quasi  non  discerneret  rebelles  et  contemptores  suae  maiestatis  a  fidelibus:  sed  quum  suos  probe  noscat,  eosdem  etiam  sub  alarum  suarum  umbra  tegere:  et  ab  improbis  ita  discernere,  ut  satis  amplam  habeant  ipsius  misericordiae  et  bonitatis  agnoscendae  materiam.  Nonne  istud  vero  maxime  conspicuum  est  Israelitarum  exemplo,  quibus  angelus  Domini  exterminatur  pepercit,  caesis  primogenitis  in  tota  Aegypto,  tam  hominum  quam  animantium?  Nam  quod  ipsorum  domus  sanguine  agni  essent  aspersae,  angelus  intactas  illas  praeteriit.  Et  quidem  sanguinis  aspersionis  nominatim  fit  mentio,  ut  sciamus  ecclesiam,  licet  in  mundo  caeteris  permixtam,  et  nullo  externo  splendore  insignem,  neque  distinctam  ullam  regionem  habentem  in  qua  tanquam  in  terrestri  paradiso  versetur:  sed  potius  multis  undique  cinctam  veritatis  hostibus,  in  quam  etiam  multi  hypocritae  fidelibus  permiscentur,  tamen  a  Deo  cognosci,  qui  suos  ab  infidelibus  facile  discernit,  modo  agni  sanguine  aspergantur,  nempe  Domini  nostri  Iesu  Christi,  ut  Paulus  loquitur.  Denique  hic  observemus  in  genere  Deum  sua  iudicia  sic  exercere,  ut  sontes  puniat,  et  quos  semel  reprobraverit  extremo  supplicio  afficiat:  et  nihilominus  bonitate  et  clementia  utatur  in  eos  quibus  vult  suam  misericordiam  patefacere.  Porro  si  contigisse  istud  videmus  Kenaeis,  ut  nimirum  misericordiam  a  Domino  sint  consequuti,  multo  minus  dubitandum  est,  quin  eundem  erga  nos  Dei  favorem  sentiamus  in  domesticorum  numerum  adsciti,  et  in  ipsius  timore  et  obedientia  ambulantes.  Nam  Kenaeos  istos  quod  attinet,  eos  apparet  postquam  admiranda  illa  Dei  opera  cognovissent,  et  cum  populo  israelitico  manna  comedissent  in  deserto,  et  superstitionibus  et  idolomaniis  renunciasset,  nihilominus  tamen  valde  in  religione  fuisse  inconstantes.  Nam,  ut  apparet,  ita  sunt  a  tentatione  superati,  ut  terram  illam  benedictam,  divino  cultui  dicatam  deseruerint,  quod  subinde  hostium  populi  Israelis  incursionibus  infestarentur.  Sane  mollitie  non  sunt  eo  adducti,  quos  duram  egisse  vitam  sub  tentoriis  antea  docuimus: