27:92  n'eust  point  permis  que  telles  povretez  fussent  advenues  entre  nous,  sinon  pour  nos  offenses.  Et  ainsi  cognoissons  que  quand  il  a  ainsi  chastie  ceux  qui  s'estoyent  venus  dresser  contre  luy  notoirement,  et  qui  avoyent  fait  leur  conte  de  ruiner  tout  son  edifice,  qu'a  leurs  despens  il  nous  a  instruits  quant  et  quant,  et  que  nous  devons  en  premier  lieu  luy  rendre  graces  de  ce  qu'il  nous  a  espargnez,  quand  nous  n'avons  point  este  enveloppez  en  la  confusion  laquelle  estoit  apprestee  a  tous,  et  qu'il  a  fait  une  separation  miraculeuse.  Voila  ce  que  nous  avons  a  observer:  la  misericorde  de  Dieu  sur  nous,  en  ce  quil  nous  a  supportez:  et  puis  qu'un  chastiment  qu'il  a  fait  sur  un  petit  nombre  de  gens,  nous  serve  a  tous,  que  ce  soit  une  instruction  commune,  et  que  chacun  en  face  son  profit.  Car  il  est  certain  que  Dieu  nous  a  declaire  comme  il  veut  que  les  choses  aillent  paisiblement,  qu'elles  ayent  leur  cours  ordinaire,  voire  selon  sa  parolle.  Car  il  n'est  point  question  ici  que  les  hommes  pretendent  faussement  le  nom  de  Dieu  pour  flechir  ne  d'un  coste  ne  d'autre.  Il  faut  que  les  ministres  de  la  parolle,  et  qui  sont  constituez  pour  l'annoncer  puissent  protester  de  leur  coste,  et  monstrer  dequoy  et  devant  Dieu  et  devant  les  hommes,  qu'ils  ne  sont  et  n'appetent  d'estre  rien,  sinon  d'avoir  l'office  que  Dieu  leur  a  donne,  et  administrer  les  Sacremens  en  telle  purete  que  les  choses  ne  soyent  point  corrompues  en  l'Eglise.  Quand  cela  y  est:  cognoissons  qu'il  nous  faut  ranger,  et  que  nous  ne  gagnerons  rien  en  nous  rebecquant:  qu'il  faudra  que  la  main  de  Dieu  nous  soit  tousiours  contraire.  Car  il  ne  met  point  en  oubli  ce  qu'il  a  institue,  il  le  veut  maintenir  et  garantir.  Apprenons  donc  de  ne  point  aspirer  a  aucun  changement  qui  soit  contre  l'ordonnance  de  Dieu:  regardons  la  reigle  qui  est  contenue  en  l'Escriture  saincte,  et  que  nul  n'attente  d'y  contrevenir  en  facon  que  ce  soit:  que  nous  aimions  mieux  mourir,  que  de  rien  inno  ver,  ni  attenter  a  l'encontre  de  nostre  Dieu.  Que  nous  soyons  donc  brebis,  si  nous  voulons  que  Iesus  Christ  soit  nostre  pasteur:  car  quiconques  n'a  point  un  esprit  debonnaire  comme  un  agneau,  celuy-la  n'est  pas  digne  d'estre  tenu  de  l'Eglise  de  Dieu,  d'autant  que  nostre  Seigneur  Iesus  Christ  ne  veut  point  estre  nostre  pasteur  qu'a  ceste  condition-la.  Voila  donc  ce  que  nous  avons  a  retenir  en  premier  lieu.  Mais  regardons  aussi  bien  a  la  malice  de  ce  peuple  des  Iuifs:  et  advisons  a  nous,  pour  n'estre  point  semblables  a  eux.  Voila  une  chose  horrible,  que  Dieu  desploye  sa  main  sur  ces  mutins,  que  voila  la  terre  qui  s'ouvre  pour  engloutir  ces  seditieux  avec  leurs  femmes,  et  leurs  enfans,  il  y  en  a  deux  cens  cinquante  de  ceux  qui  avoyent  murmure  contre  Moyse,  et  Aaron,  qui  sont  aussi  exterminez  visiblement,  qu'on