52:91  91  EPIST.  PAULI  AD  COLOSSENSES  92  spiritus  sancti  donationem,  qua  reformamur  ad  imaginem  Dei.  Et  locus  est  observatione  dignus,  non  conferri  nobis  gratuitam  iustitiam  in  Christo,  quin  spiritu  etiam  regeneremur  in  oboedientiam  iustitiae  :  quemadmodum  alibi  (1.  Corin.  1,  30)  docet,  Christum  nobis  factum  esse  iustitiam  et  sanctificationem.  Illud  consequimur  acceptatione  gratuita:  hoc  autem  dono  spiritus  sancti,  dum  novi  homines  efficimur.  Utriusque  autem  gratiae  individuus  est  nexus.  Caeterum  notemus  sanctitatem  hanc  inchoatam  esse  in  nobis  duntaxat,  et  in  dies  progressus  facere:  sed  non  fore  perfectam,  donec  Christus  ad  omnium  instaurationem  apparuerit.  Nam  perperam  olim  Coelestini  et  Pelagiani  hoc  loco  abutebantur,  ut  excluderent  gratiam  remissionis  peccatorum.  Fingebant  enim  perfectionem  in  hoc  mundo,  quae  Dei  iudicio  satisfaceret,  ut  supervacua  esset  misericordia.  Paulus  autem  nequaquam  hic  docet  quid  in  hoc  mundo  impleatur:  sed  quis  finis  sit  vocationis  nostrae,  et  quae  bona  nobis  a  Christo  afferantur.  23.  Si  quidem  permanetis.  Hortatio  ad  perseverantiam,  qua  admonet  irritum  fore  quidquid  hactenus  gratiae  illis  collatum  erat,  nisi  maneant  in  sinceritate  evangelii.  Atque  ita  significat  eos  adhuc  esse  in  profectu,  nondum  metam  attigisse.  Nam  tunc  insidiis  pseudoapostolorum  periclitabatur  apud  eos  fidei  stabilitas:  graphice  autem  depingit  fidei  certitudinem,  quum  in  ea  iubet  Colossenses  fundatos  esse  ac  stabiles.  Neque  enim  similis  est  fides  opinationi,  quae  variis  motibus  quatitur  :  sed  habet  firmam  constantiam,  quae  omnibus  inferorum  machinis  resistat.  Itaque  tota  papalis  theologia  nunquam  vel  tenuem  gustum  verae  fidei  dabit:  quae  pro  axiomate  habet,  semper  esse  dubitandum  tam  de  praesenti  statu  gratiae,  quam  de  finali  perseverantia.  Postea  etiam  relationem  notat  quae  fidei  est  cum  evangelio,  quum  dicit  tunc  fore  stabiles  in  fide  Colossenses  si  non  labefactentur  a  spe  evangelii:  hoc  est,  quae  per  evangelium  nobis  affulget.  Nam  ubi  evangelium,  illic  spes  est  salutis  aeternae.  Sed  meminerimus,  summam  omnium  in  Christo  contineri.  Ideo  hic  fugere  doctrinas  omnes  praecipit  quae  a  Christo  abducunt,  ut  alibi  occupentur  hominum  mentes.  Quod  audistis.  Quia  evangelii  nomen  superbe  etiam  iactare  solent  pseudoapostoli  qui  Christum  lacerant  et  conscindunt:  et  hoc  usitatum  Satanae  artificium,  falso  evangelii  praetextu  conscientias  turbare:  ut  confusa  sit  evangelii  veritas:  ideo  nominatim  Paulus  asserit  hoc  genuinum,  hoc  indubium  esse  evangelium  quod  audierant  Colossenses,  ab  Epaphra  scilicet,  ne  aurem  praeberent  contrariis  doctrinis.  Addit  praeterea  confirmationem,  illud  ipsum  esse  quod  per  totum  orbem  praedicatum  sit.  Non  vulgaris,  inquam,  est  ista  confirmatio,  quum  audiunt  se  habere  universalem  ecclesiam  sibi  consentientem  :  nec  se  aliud  doctrinae  genus  sequi,