46:903  903  SERMONS  904  nous  sera  comme  un  obiect  de  scandale  pour  nous  aliener  de  nostre  Seigneur  Iesus  Christ,  et  par  consequent  de  toute  esperance  de  salut.  Mais  nous  avons  a  contempler  par  foy  le  Royaume  spirituel  duquel  a  este  fait  mention  ci  dessus:  et  alors  nous  pourrons  conclure,  combien  que  les  hommes  se  mocquent  du  Royaume  de  nostre  Seigneur  Iesus  Christ,  qu'il  ne  laisse  pas  de  tousiours  estre  prise  selon  qu'il  en  est  digne,  et  devant  Dieu,  et  devant  ses  Anges.  Mesmes  nous  avons  a  reduire  en  memoire  que  le  Fils  de  Dieu  a  ainsi  este  traitte  en  sa  personne,  afin  de  recevoir  sur  soy  toute  l'ignominie  que  nous  meritons.  Car  qu'est-ce  que  nous  pouvons  apporter  devant  Dieu  cependant  que  nous  sommes  souillez  de  nos  iniquitez?  Mais  d'autant  que  nostre  Seigneur  Iesus  a  souffert  qu'on  luy  crachast  au  visage,  qu'il  a  voulu  estre  soufflete,  qu'il  a  receu  tous  opprobres,  voyla  comme  auiourd'huy  nous  sommes  recognus  et  avouez  pour  enfans  de  Dieu,  et  voyla  ou  consiste  nostre  fiance.  Mesmes  aussi  nous  avons  tousiours  a  considerer  que  Dieu  nous  veut  induire  a  estre  mieux  touchez  de  nos  fautes,  pour  les  avoir  en  horreur  et  detestation,  quand  nous  voyons  qu'il  a  falu  que  le  Fils  de  Dieu,  pour  les  reparer  et  pour  nous  acquerir  grace  et  absolution,  ait  tant  endure,  et  que  le  Pere  celeste  ne  l'ait  point  espargne.  Voyans  donc  la  confusion  de  nos  pechez  estre  telle  en  la  personne  du  Fils  de  Dieu,  nous  avons  bien  a  nous  humilier  et  estre  du  tout  confus  en  nous  mesmes.  Et  cependant  nous  devons  aussi  prendre  courage,  et  estre  fondez  en  telle  fiance,  que  nous  ne  doutions  point,  quand  nous  viendrons  devant  Dieu,  que  nostre  Seigneur  Iesus  Christ  nous  a  acquis  grace,  quand  il  a  souffert  d'estre  ainsi  vilipende  a  cause  de  nous.  Car  il  nous  a  acquis  gloire  et  dignite  devant  Dieu  et  ses  Anges  par  ce  moyen.  Or  il  est  dit  yci  que  nostre  Seigneur  Iesus  a  este  mene  au  lieu  qui  se  nommoit  Golgotha,  c'est  a  dire  le  lieu  de  Test.  Le  mot  Hebrieu  dont  cestuyci  descend  signifie  Rouler:  mais  ils  en  ont  ainsi  use  pource  que,  quand  un  corps  sera  pourri,  on  trouvera  la  teste  toute  seche,  et  c'est  comme  une  boule  qui  coule.  On  appeloit  donc  ce  lieu  Golgotha  a  cause  que  beaucoup  de  malfaiteurs  estoyent  la  punis,  et  voyoit-on  la  les  testes.  Yci  nous  avons  a  reduire  en  memoire  ce  que  dit  l'Apostre  en  l'Epistre  aux  Hebrieux,  que  nostre  Seigneur  Iesus  Christ  a  este  mene  hors  de  la  ville,  comme  les  sacrifices  avoyent  accoustume,  voire  ceux  qu'on  brusloit,  et  desquels  le  sang  estoit  porte  au  Sanctuaire  pour  effacer  les  macules  du  peuple.  Or  il  estoit  dit  qu'un  tel  sacrifice  estoit  comme  malediction:  il  faloit  donc  qu'il  fust  reiette  loin.  Voyla  le  Fils  de  Dieu  qui  a  voulu  recevoir  ceste  condition  sur  soy,  afin  que  nous  scachions  qu'a  la  verite  nous  sommes  maintenant