44:90  emphatice  hoc  additum  sit,  Ego  illic  vobis  ero  propitius,  hoc  est,  in  templo:  quasi  diceret,  debuit  vos  infirmitas  vestra  monere  opus  vobis  esse  adminiculo  isto,  nempe  ut  me  in  sanctuario  colatis.  Iam  quum  dederim  vobis  quasi  visibile  speculum  meae  praesentiae  inter  vos,  ubi  volui  templum  mihi  aedificari  in  monte  Sion:  si  templum  contemnitis,  nonne  hoc  perinde  est  ac  si  a  vobis  reiicerer.  Postea  addit,  Et  glorificabor',  inquit  Iehova.  Videtur  causam  exprimere  cur  propitius  futurus  sit:  quia  scilicet  videbit  gloriam  suam  curae  esse  Iudaeis.  Quanquam  posset  etiam  seorsum  accipi  haec  ratio.  Et  hoc  posterius  mihi  magis  placet.  Duos  igitur  stimulos  admovet  propheta,  quibus  expergefiant  Iudaei,  nempe  quia  ubi  exstructum  fuerit  templum,  Deus  ipsos  benedicet.  Poterunt  enim  ipsum  placare:  et  quoties  sentient  sibi  iratum,  supplices  poterunt  accedere  ad  petendam  veniam.  Haec  una  ratio  est  cur  strenue  ipsos  incumbere  deceat  ad  structuram  templi.  Secunda  ratio  est,  quod  Deus  glorificabitur.  Quid  autem  magis  absurdum,  quam  Deum  liberatorem  sperni,  praesertim  tam  recenti  memoria?  Quomodo  autem  glorificatus  fuerit  Deus  in  templo  illo,  iam  breviter  exposui,  non  quia  quidquam  Deo  accesserit,  nisi  quatenus  exercitia  illa  pietatis  tunc  necessaria  erant,  nempe  quum  adhuc  pueris  similes  essent  Iudaei.  Nunc  sequitur:  9.  despexistis  ad  multum,  et  ecce  parum,  et  intulistis  in  domum,  et  sufflavi  in  illud.  Cur  hoc?  dicit  Iehova  exercituum:  Propter  domum  meam  quae  est  deserta,  et  vos  curritis  (vel  addicti  estis  quisque  domi  suae)  quisque  in  domum  suam.  Iterum  hic  commemorat  propheta  Iudaeos  privari  alimentis,  et  quodammodo  tabescere  in  sua  inopia,  quoniam  laudaverint  Deum  debito  cultu.  Primum  rem  ipsam  recitat,  Respexistis  ad  multum,  inquit,  et  ecce  parum.  Poterit  fieri  ut  quis  contentus  sit  vel  tenuissimo  victu,  quia  non  plus  appetat.  Quibus  sufficit  sua  egestas,  illi  non  admodum  anxii  sunt,  etiam  si  suppetat  exigua  victus  portio,  etiamsi  vesci  cogantur  glandibus,  tamen  non  multum  appetent  frumentum  qui  obduruerunt  ad  mala  ferenda.  Sed  qui  ardent  cupiditate,  magis  tanguntur,  et  vulnerantur  etiam  sua  egestate.  Haec  ratio  est  cur  dicat  propheta,  Respexistis  ad  multum,  et  ecce  erat  parum,  hoc  est,  non  estis  similes  hominibus  rusticis,  qui  modo  ventrem  farciant  qualicunque  victu,  non  admodum  tanguntur  sua  egestate:  sed  cupiditas  vos  inflammat  ad  copiam  appetendam.  Quaeritis  ergo,  et  avide  studetis  hinc  inde  rapere:  sed  ecce  parum,  inquit.  Deinde  intulistis  in  domum.  Hursus  proponit  alteram  speciem  mali,  quod  etiam  dum  contrahunt  et  vinum,  et  triticum,  et  pecuniam,  haec  statim  omnia  evanescant.  Intulistis  ergo  in  domum