39:90  quod  iubebat  Deus,  sed  paulo  post  lex  illa  fuit  quasi  sepulta.  Quum  ergo  hic  conqueritur  vocem  suam  non  fuisse  auditam,  non  debet  ita  generaliter  exponi  ac  si  omnibus  saeculis  lex  fuisset  spreta:  sed  perinde  est  ac  si  diceret,  Iam  olim  patres  vestri  immorigeri  fuerunt,  quia  non  manumiserunt  servos  praescripto  tempore,  hoc  est,  completo  sexennio.  Hic  locus,  ut  complures  alii,  satis  docet  quanta  fuerit  illius  populi  contumacia.  Lex  certe  de  qua  nunc  agimus  debuit  Iudaeis  esse  iucunda  quum  viderent  se  privilegio  quodam  eximi  a  communi  iure  et  praeferri  cunctis  gentibus.  Quum  ergo  viderent  hoc  testimonium  esse  insignis  Dei  benevolentiae  erga  Abrahae  semen,  debebat  haec  cognitio  ipsos  allicere  ad  servandam  legem,  quum  in  ea  agnoscerent  quod  maxime  optandum  ipsis  erat.  Sed  ut  quisque  addictus  erat  privatae  utilitati,  ita  factum  est  ut  pauperculi  opprimerentur,  et  servitus  temporalis  mutata  fuerit  in  perpetuam.  Ergo  non  mirum  est  si  statim  homines  obliviscantur  quid  rectum  sit  etiamsi  ad  momentum  visi  fuerint  aurem  praebere  Deo.  Hoc  fuit  commune  vitium  omnibus  saeculis,  ut  leges  Dei  venerint  statim  in  oblivionem  et  contemptum,  sicuti  lex  manumissionis,  quae  tamen  maxime  erat  favorabilis,  obsolevit,  ut  vidimus.  Addit,  Neque  inclinarunt  aurem  suam.  Diximus  alibi  emphaticam  esse  hanc  loquutionem  ubi  subiicitur  verbo  non  audiendi.  Nam  exprimitur  quasi  professa  malitia,  dum  scilicet  homines  aures  suas  obturant,  neque  admittunt  quod  rectum  est.  Fieri  potest  ut  quis  negligat  quod  dicitur  vel  non  intelligat:  sed  ubi  quis  data  opera  claudit  aures,  hoc  signum  est  perditae  contumaciae.  Deus  ergo  exprimere  solet  hac  loquendi  forma  pervicaciam  et  duritiem,  quae  fuit  in  veteri  populo,  quod  scilicet  respuerint  omnem  sanam  doctrinam.  Hoc  autem  diligenter  notandum  est,  quia  ubi  clare  personat  vox  Dei,  frustra  iactamus  non  assequi  nos  quid  velit:  neque  enim  obscure  loquitur,  quemadmodum  dicit  apud  Isaiam  (45,  19).  Unde  igitur  fit,  ne  doctrina  fructum  suum  apud  nos  proferat?  nempe  quia  eam  sponte  respuimus,  et  claudimus  aures,  neque  admittimus  Deum  ipsum  loquentem.  Quod  autem  accusat  Deus  patres,  ratio  est  quia  comparatio  magis  amplificat  scelus  filiorum,  qui  postquam  finxerunt  se  tangi  et  studio  pietatis,  et  sensu  misericordiae  statim  redierunt  ad  ingenium,  quemadmodum  sequitur,  Vos  autem  conversi  estis  hodie,  et  fecistis  quod  rectum  erat  in  oculis  meis  promulgando  libertatem,  quisque  proximo  suo.  Videtur  Deus  principio  laudare  populum:  et  certe  hoc  in  laude  ducendum  fuit,  quod  scilicet  populus,  postquam  admonitus  fuit,  legem  Dei  perverse  fuisse  contemptam,  se  obtulit  ad  praestandum  officium  :  sed  quia  resipiscentiae  signum  dedit  fallaciter,  et  non  praestitit  re  ipsa  quod  pollicitus  fuerat,  hinc  crimen