30:90  administrare?  Idcirco  itaque  Samuel  illum  admonet,  ipsum  a  Deo  in  hunc  finem  in  tantam  dignitatem  evectum,  ut  Deo  morem  gereret,  seseque  ad  ipsius  voluntatem  componeret.  Equidem  vero  fateor,  non  omnes  qui  hodie  ad  rerum  gubernacula  sedent,  eodem  modo  quo  Saul  fuisse  vocatos,  non  adhibitam  specialem  unctionem,  et  nihil  tale  quale  in  Saulis  electione  factum:  verum  tamen  vera  illa  est  sententia  et  indubitata,  omnem  potestatem  esse  a  Domino.  Quamobrem  necesse  est  eos  qui  caeteris  dominantur  hunc  locum  diligenter  observare,  ut  muneris  sui  partes  omnes  ad  Dei  voluntatem  referant,  et  suae  administrationis  ratio  inde  omnis  pendeat:  ac  proinde  in  hunc  unicum  scopum  illos  oportere  collimare  ut  commissum  sibi  munus  impleant,  cuius  olim  Deo  fideliter  rationem  reddant:  quandoquidem  in  eam  dignitatem  ipsos  evexit,  hoc  fine  ne  a  sua  voluntate  recedant.  Itaque  Dei  mandatum  sedulo  exquirant,  ac  diligenter  meditentur,  ut  revera  testari  possint,  se  nihil  nisi  quod  Deo,  a  quo  dignitatem  tantam  acceperunt,  gratum  et  acceptum  sit,  suscepisse  et  gessisse.  Et  de  istis  hactenus:  sequitur  deinceps,  Saulem  statim  post  acceptum  mandatum,  id  promulgasse  apud  populum,  et  eos  recensuisse  in  Telaiim.  Haec  vox  Telaiim,  potest  accipi  pro  loco  quodam  in  quo  recensitus  sit  populus,  ut  sit  nomen  proprium.  Quanquam  quoniam  aliquando  est  appellativum,  et  significat  agnos:  quidam  dicunt  singulos  attulisse  ad  Saulem  agnum,  ut  dinumerari  possent,  quod  Deus  numerari  populum  prohibuisset.  Sed  coniectura  illa  est  inanis  et  ridicula.  Quis  enim  dixerit  e  tanta  multitudine  singulos  agnum  attulisse,  ut  quum  ducenta  millia  peditum  fuerint,  etiam  ducenti  mille  agni  sint  allati,  sine  iis  qui  ex  tribu  Iuda  decem  millia  fuerunt.  Merae  istae  sunt  nugae  et  inanes  ac  ridiculae.  Alii  qui  haec  per  quandam  similitudinem  dici  volunt,  aliqua  ratione  niti  videntur:  Saulem  eos  qui  ad  se  coacti  sunt  numerasse  tanquam  agnos,  id  est,  ut  solent  opiliones  illas  pecudes  pro  voluntate  tractare  et  regere,  quod  sint  faciles  animantes,  sic  etiam  Saulem  populum  illum  facilem  expertum  fuisse.  Et  sane  haec  expositio  plus  habet  verisimilitudinis  quam  illa  prior.  Nempe,  non  fuisse  populum  refractarium  neque  contumacem,  neque  etiam  tardum  ad  obsequium,  sed  simul  omnes  convenisse,  ut  instar  agnorum  numerari  potuerint.  Caeterum  quum  numerari  populum  audimus  fuisse  prohibitum  a  Deo,  non  ita  intelligendum,  quasi  non  liceret  lustrare  exercitum  et  recensere  milites  in  bellum  profecturos,  quemadmodum  in  libris  Iudicum  saepe  coactos  et  recensitos  milites  legimus,  quorum  etiam  numerus  exprimitur.  Sed  Deus  hunc  honorem  illibatum  sibi  reservari  voluit,  ne  temere  numeraretur  populus,  quem  peculiarem  sibi  delegerat  :  qua  ratione  voluit  ambitionis  occasionem