45:9  9  LUC.  I.  10  in  ordinem  privatum  coacta  erat,  et  paulo  post  dux  ultimus  ex  gente  illa  Ioannes  occisus  fuit,  non  tamen  in  totum  exstinctus  fuit  dominatus,  quia  manebat  adhuc  synedrion,  hoc  est,  delectum  concilium  ex  familia  et  posteris  Davidis,  cuius  summa  erat  autoritas,  duravitque  usque  ad  Herodem,  qui  nefanda  iudicum  caede  poenam  sibi  olim  inflictam  ultus  est,  quod  caedis  damnatus  in  voluntarium  exsilium  migrare  coactus  fuerat,  ut  supplicium  capitis  effugeret.  Regnum  ergo  Herodis,  eo  quod  alienigena  esset,  non  fregit  sceptrum  tribus  Iuda,  sed  quia  abolitum  fuit  eius  latrocinio,  quidquid  in  tribu  illa  dignitatis  residuum  manebat.  Quod  autem  collapsa  multo  ante  fuerat  regia  dignitas,  et  paulatim  fere  conciderat  dominatus,  non  pugnat  ea  interruptio  cum  prophetia  Iacob.  Duo  enim  in  speciem  diversa  promiserat  Deus:  aeternum  fore  solium  Davidis,  postquam  vero  dirutum  esset,  eius  ruinas  se  instauraturum:  aeternam  fore  regni  potentiam,  et  tamen  surculum  proditurum  ex  trunco  Isai,  quorum  utrumque  impleri  oportuit.  Passus  est  ergo  Deus  principatum,  quem  erexerat  in  tribu  Iuda,  ad  tempus  collabi,  quo  maior  esset  populi  attentio  ad  sperandum  Christi  regnum.  Quum  autem  synedrii  interitu  spes  fidelium  quasi  praecisa  esset,  repente  affulsit  Dominus.  Iam  vero  hoc  ad  seriem  historiae  pertinet,  dum  notatur  tempus  rei  gestae:  sed  non  temere  sub  regis  nomine  simul  misera  temporis  conditio  notata  fuit,  ut  agnoscerent  Iudaei,  vertendos  iam  oculos  esse  in  Messiam,  si  quidem  foedus  Dei  bona  fide  colerent.  Zacharias  de  vice  Alia.  Notum  est  ex  sacra  historia,  descriptas  fuisse  a  Davide  sacerdotum  familias  certis  ordinibus.  Qua  in  re  nihil  aggressus  est  David  contra  legis  praescriptum.  Sacerdotium  Deus  Aaroni  et  eius  filiis  contulerat:  reliquos  levitas  destinaverat  minoribus  officiis.  In  eo  nihil  mutatum  fuit  a  Davide,  sed  consilium  eius  fuit,  partim  cavere,  ne  quid  tumultuose  fieret  in  turba,  partim  etiam  occurrere  ambitioni  et  simul  efficere,  ne  paucis  totum  munus  ad  se  trahentibus  maior  pars  otiosa  domi  sederet.  In  illa  autem  distributione  octavam  classem  tenuit  Abia,  filius  Eleazar.  Erat  ergo  Zacharias  ex  genere  sacerdotali,  et  quidem  ex  posteris  Eleazar,  qui  patri  in  summum  sacerdotium  successerat.  Quomodo  autem  Elisabeth,  quum  esset  e  filiabus  Aaron,  Mariae  cognata  esse  potuerit,  suo  loco  expediam.  Honoris  certe  causa  genus  Elisabeth  Lucas  commemorat:  licebat  enim  Zachariae  secundum  legem  gregarii  cuiuspiam  levitae  filiam  sibi  uxorem  sumere.  Ex  pari  igitur  coniugio  apparet,  hominem  in  suo  ordine  non  fuisse  contemptum.  6.  Erant  iusti  ambo  coram  Deo.  Praeclarum  illis  testimonium  reddit,  non  modo  quod  sancte  et  integre  versati  sunt  inter  homines,  sed  coram  Deo